Որքան է հետ բերած թալանն ու դրա քանի տոկոսն են կազմում պարգևավճարները. Սո՞ւտ, մանիպուլյացիա՞, թե՞ մաթեմատիկայի չիմացություն

Հայաստանում ապօրինի ծագում ունեցող գույքի բռնագանձման շրջանակում 2025 թվականին պետական բյուջե է վերադարձվել 426 մլն 863 հազար 917 դրամ։ Այս մասին Panorama.am-ի  հարցմանն ի պատասխանհայտնեցին  Գլխավոր Դատախազությունից՝ միաժամանակ տեղեկացնելով, որ այս թվում շարժական և անշարժ գույքերը ներառված չեն: Միաժամանակ դատախազությունը պատասխանին չի կցել «հատիկ առ հատիկ» հետբերված գույքերի ցանկը։

Ինչևէ, դրամային արտահայտությամբ մեկ տարում պետությունը վերադարձրել է շուրջ 427 մլն դրամ։ 

2026 թ. հունվարի 14–ին հայտնի դարձավ, որ ՀՀ վարչապետ Նիկոլ Փաշինյանը ստորագրել է մի փաստաթուղթ, որով խրախուսման ֆոնդից շուրջ 3 մլրդ դրամ է հատկացվել՝  կառավարության պաշտոնյաներին պարգևավճարներ տալու համար։ Այսպես՝ բաժնի պետերը ստացել են մոտ 1,5-2 միլիոն դրամ, վարչության պետերը՝ 2,5-3 միլիոն դրամ, փոխնախարարները՝ 3,5-4,5 միլիոն դրամ, իսկ նախարարները՝ մինչև 6-7 միլիոն դրամ։

Ստացվում է, որ մի կողմից այդքան աղմուկ բարձրացրած ապօրինի ծագում ունեցող գույքի բռնագանձման օրենքի շրջանակում 1 տարում կարողացել են բյուջե մուտք անել ընդամենը 427 մլն դրամ, մյուս կողմից՝ դրա ավելի քան վեցապատիկը բաժանել են միայն Կառավարության անդամներին ու այնտեղ աշխատող միջին օղակներին որպես պարգևավճար։ 

Ուշագրավ է նաև Փաշինյանի արձագանքը պարգևավճարների վերաբերյալ քննադատություններին։

Հիշեցնենք՝ նա ԱԺ-ում ասել էր, որ թալանածը հավաքել են և բաշխել են։

«Թալանածի 0.0001%-ը ներդրել ենք մեր պետական ապարատի վրա»,- հայտարարել էր  Փաշինյանը։  

Այս հայտարարությանն արձագանքել էր «Ապրելու երկիր» կուսակցության համահիմնադիր Մեսրոպ Առաքելյանը՝ ներկայացնելով հաշվարկ ու ցույց տալով, որ Փաշինյանի պնդումները, մեղմ ասած, կտրված են իրականությունից ու մաթեմատիկայից։

«Փաշինյանը հայտարարում է, որ պարգևավճարներին ուղղվել է վերադարձված թալանի 0,000001%-ը։ Հիմա եկեք հասկանանք, որ թվի 0,000001%-ն է 3 մլրդ դրամ կազմող պարգևավճարները։

800.000.000.000.000 (800 տրիլիոն) դոլար, որը կազմում է Հայաստանի 96,000 տարվա բյուջեի չափ գումար։ Ասել եմ ու էլի եմ ասում,  մաթեմ չիմացող մարդկանց պետք է հեռու պահել պետական պաշտոններից, շաատ հեռու»,- գրել էր նա։ 

Թվերի համադրությունը ցույց է տալիս, որ ապօրինի գույքի բռնագանձման գործընթացը, որը ներկայացվում է որպես պետական ֆինանսների համալրման առանցքային գործիք, առայժմ ապահովում է սահմանափակ ֆինանսական արդյունք՝ հատկապես պետական բյուջեի ծավալների համատեքստում։ Միաժամանակ, նույն ժամանակահատվածում պետական համակարգում խրախուսումների համար հատկացված գումարը բազմակի գերազանցում է վերադարձված միջոցները։