«...Որոշեցինք այցելել մեր ապուպապի կառուցած եկեղեցի ու մասնակցել սուրբ և անմահ պատարագին»
Իրավապաշտպան Ռուբեն Մելիքյանը ֆեյսբուքյան էջում զետեղել է լուսանկար՝ ԱԳՆ նախկին Գլխավոր քարտուղար Վահագն Մելիքյանի հետ, գրել.
«1828 թվականին Մելիք Իսրայելը հավաքում է իր ժողովրդին ու Սալմաստից տեղափոխվում Արարատյան դաշտ։ Հիմնում է Արտաշատ գյուղը և տեղում կառուցում Սբ.Աստվածածին բազիլիկ եկեղեցին, որի պատի տակ էլ տարիներ անց թաղվում է։
Հետո Արտաշատը վերանվանվում է Վերին Արտաշատ։ Հետո գալիս են բոլշևիկները և Եկեղեցին վերածում են պահեստի։ Հետո բոլշևիկները գնում են ու Սբ.Աստվածածինը վերադարձվում է Եկեղեցուն։ Հետո բարերարները նորոգում են այն ու մոտքի մոտ կառուցում հոյակերտ զանգակատուն։
Մելիք Իսրայելի որդին է Պողոսը, որի որդին է Մկրտիչը, որի որդին է Անդրանիկը, որի որդին է Նորայրը, որի որդին եմ ես։
Այսօր ես ու Վահագն Մելիքյանը, Պողոսի որդի Վրեժի որդի Գուրգենի որդին, որոշեցինք այցելել մեր ապուպապի կառուցած եկեղեցի ու մասնակցել Սուրբ և Անմահ Պատարագին, որ մատուցեց Տեր Եղիշե քահանա Նուրիջանյանը։ Մենք շատ ուրախացանք, որ Սբ.Աստվածածինը տեսանք շեն ու բարեկարգ, համայնքն էլ՝ միահամուռ ու համերաշխ՝ զարդարված սիրով ու ջերմությամբ։
ՀԳ. Երբ «Գոհության» հատվածում սարկավագները երգում էին «վասն շինողաց սրբոյ եկեղեցւոյս եւ որք ընդ հովանեաւ սորին են հանգուցեալ», անբացատրելի զգացողություն ունեցա՝ զորության ու ինքնության ու ժառանգության ու հավերժության մի համաձույլ»։
Հետևեք մեզ Facebook-ում