Սամվել Կարապետյանի գործը քննող 53 քննիչները 22 են դարձել՝ չնայած հայտարարում էին, թե դեռ ինտենսիվ քննություն են անցկացնելու. Վարդևանյան

«Շնորհակալություն եմ հայտնում Հայաստանի Հանրապետության նորագույն պատմության ընթացքում ամենախայտառակ քաղաքական հետապնդման վերաբերյալ ձեր մշտական լուսաբանումների համար»,-գործարար Սամվել Կարապետյանի տան դիմաց ասաց փաստաբան Արամ Վարդևանյանը։

Նա նշեց, որ այն, թե ինչ է տեղի ունենում Սամվել Կարապետյանի նկատմամբ արդեն 7 ամիս, աբսուրդային է։

Տեղեկացնելով, որ Կարապետյանի նկատմամբ կրկին կիրառվել է կալանքը, որպես խափանման միջոց՝ Արամ Վարդևանյանն ասաց. «Վերաքննիչ հակակոռուպցիոն դատարանի որոշումը ենթադրում էր կրկին կալանքի ռեժիմը,  և այն դատական նիստը, որ գործընկերների հետ ունեցանք 14 ժամ տևողությամբ և դատավոր Դոլմազյանի նախագահությամբ, կրկին հանգեցրեց նրան, որ տնային կալանքը կիրառվեց, որպես խափանման միջոց»։

 Վարդևանյանը տեղեկացրեց, որ վերջին որոշմամբ վերացվել են նաև կարապետյանի նկատմամբ  նախկինում կիրառված հրապարակային խոսքի արգելքը։

«Այն, որ Սամվել Կարապետյանի նկատմամբ ոչ մի խափանման միջոց չպետք է կիրառվի, այն որ այստեղ ընդհանրապես գործ չկա, բայց կա 7 ամսից ավել տևող ինտենսիվ քրեական հետապնդում, այն հայտնի է բոլորին»,-ասաց Վարդևանյանը և հավելեց. «Սամվել Կարապետյանը որպես ուժեղ մարդ, ուժեղ հայի տեսակ, չնայած այդ ամենին, 7 ամիս կալանք ունեցավ»։

Նա հայտարարեց, որ Հայաստանում նաև հումանիտար ճգնաժամ կա, երբ իրավապահներն առանց բացատրության ընդհատել են երկկողմանի թոքաբորբ տարած Կարապետյանի ներերակային ներարկում և կրկին տարել կալանքի։

«Հիշում եք, մենք ունեինք 53 քննիչներից բաղկացած քննչական խումբ, այն այլևս 22 քննիչ է դարձել, երբ հայտարարում էին, թե շատ ինտենսիվ քննություն պետք է անցկացնեն»,- ասաց փաստաբանը:
Աղբյուրը` Panorama.am