Սանկտ Պետերբուրգում մահացած են գտել Արցախի նախկին պաշտոնյա Բորիս Ավագյանին․ ԶԼՄ–ներ

Սանկտ Պետերբուրգում Հայաստանի հյուպատոսության շենքում մահացած են գտել Արցախի Հանրապետության նախագահի հատուկ հանձնարարությունների գծով նախկին ներկայացուցիչ Բորիս Ավագյանին, հաղորդում են մի շարք տելեգրամյան ալիքներ:

SHOT ալիքի տվյալներով՝ Ավագյանին հայտնաբերել են զուգարանում՝ անգիտակից վիճակում։ Դեպքի վայր է կանչվել շտապօգնության մեքենա, սակայն բժիշկները արձանագրել են նախկին պաշտոնյայի մահը։ «Фонтанка»–ի տվյալներով՝ նա ինքնասպանություն է գործել, փոխանցում է Gazeta.ru-ն։

Ավելի վաղ նա փախել էր դատարանից, որտեղ նրան պետք է խափանման միջոց ընտրեին ավելի քան 4,2 միլիարդ ռուբլի մաքսատուրքերի վճարումից խուսափելու գործով։ Երեկ տեղեկություն էր տարածվել, որ Ավագյանը գտնվում է Սանկտ Պետերբուրգում Հայաստանի հյուպատոսության շենքում և խնդրում է իրեն արտահանձնել Հայաստան:
--

Տեղի ունեցածն առեղծվածային, առնվազն՝ տարօրինակ տպավորություն է թողնում, սա՝ չափազանց մեղմ ասած: 
Բառացիորեն նախօրեին Բորիս Ավագյանի հետ զրուցել էր «Փաստինֆո» գործակալության թղթակիցը: Ըստ որում, Ավագյանն ինքն էր զանգահարել լրատվամիջոցին, հայտնել, թե որտեղ է գտնվում, ինչ է ուզում անել: Նա հստակ նշել է, որ ՀՀ հյուպատոսությունում է գտնվում և ցանկանում է արտահանձնված լինել Հայաստանին: Ու դրանից մի քանի ժամ անց տարածվում է տեղեկություն, որ նա մահացել է: 
Ահա այդ տեղեկատվությունը.
««Փաստինֆոյի» հետ կապ է հաստատել Արցախի Հանրապետության նախագահի հատուկ հանձնարարությունների գծով նախկին ներկայացուցիչ Բորիս Ավագյանը՝ հայտնելով, որ գտնվում է Սանկտ Պետերբուրգի ՀՀ հյուպատոսարանում։ 

«Վերջին 1 ամսվա ընթացքում ՌԴ հատուկ ոստիկանության աշխատակիցները ձերբակալել են, տարել ոստիկանություն, փաստաղթեր ստուգելու, քանի որ Հայաստանը հետախուզում է հայտարարել իմ նկատմամբ։ Ես կամավոր ցանկանում եմ, որ ինձ արտահանձնեն Հայաստան»,-ասաց նա։ 

Հարցին, թե Հայաստանում իր նկատմամբ քրեական հետապնդում է հայտարարված՝ մտավախություն չունի՞, որ այստեղ իրեն ձերբակալություն է սպասվում՝ Ավագյանն ասաց, որ իր նպատակը հենց դա է։ «Թող ձերբակալեն ու քննություն իրականացնեն, հետո դատարանը կորոշի՝ մեղավոր եմ, թե ոչ»,-հայտնեց Ավագյանը։ 

Հիշեցնենք, որ Ավագյանը հետախուզվում է Երևանում սահմանի անօրինական հատման և փողերի լվացման համար»։