Հարուցված է քրեական վարույթ Երևանի 147 մանկապարտեզի վերաբերյալ

«Երևան քաղաքի ավագանու անդամ Մեսրոպ Մանուկյանի և բլոգեր Արթուր Չախոյանի կողմից այսօր հրապարակված թիվ 147 մանկապարտեզի հիմնանորոգման ենթադրյալ չարաշահումների և կոռուպցիայի վերաբերյալ տեղեկությունների կապակցությամբ ցանկանում եմ տեղեկացնել, որ դեռևս 2023 թվականին ՀՀ քննչական կոմիտեի կողմից հարուցվել է քրեական վարույթ նշված մանկապարտեզի վերաբերյալ»,-այս մասին հայտնում է  Երևանի քաղաքապետի  մամուլի խոսնակ Հայկ Կոստանյանը։ 

Հիշեցնենք՝ այսօր ավելի վաղ Երևանի ավագանու անդամ Մեսրոպ Մանուկյանը տեսանյութ էր հրապարակել Շենգավիթի թիվ 147 մանկապարտեզից, ցույց է տվել, թե ինչպես են պոկվում սալիկները,  շենքի մի պատն ընդհանրապես սալիկապատած չէ, իսկ երկրորդ հարկից երեխաների համար նախատեսված վթարային ելքը քանդված է։ Մանուկյանն ասել է, որ դիմել էր Երևանի քաղաքապետարան և պարզել, որ կատարողականով Շենգավիթի թիվ 147 մանկապարտեզի վրա ծախսվել է 237 մլն դրամ, որը պետք է գործեր 2023 թվականից, բայց չի գործում։