Հեծանիվը՝ որպես կրկին «մարդկային դեմք» ստանալու և մանթրաժից դուրս գալու փո՞րձ

Ամերիկացիները կրկնում են նախկին ԽՍՀՄ-ի գրեթե բոլոր սխալները, երբ սովետները իրենց մարքս-լենինյան շրջաբերականները, գրեթե նույնությամբ, փորձում էին տարածել Աշխարհի տարբեր վայրերում՝ հաշվի չառնելով նրանց ազգային առանձնահատկությունները: Հասկանալի էր, որ նույն ուսմունքը չէր կարող  կյանքի կոչվել, ասենք, և՛  Աֆղանստանում,  և՛ Լեհաստանում:

Դրա պատճառով էլ ԽՍՀՄ-ը փլուզվեց՝ իր հետ տանելով բոլոր վատ հուշերը:

Այսօր ամերիկացիները գրեթե նույն սխալներն են կատարում, իրենց լենինյան, կներեք, «դեմոկրատական» թեզիսները տարածելով Աշխարհով մեկ, նույն ձևով և ոճով:

Արդյունքում  ընդամենը երկու տարի առաջ նույն աֆղանցիները վռնդեցին նույն ամերիկացիներին իրենց երկրից, նույն պատճառով, ինչպես որ  եղավ սովետների հետ:

Դատելով այն բանից, թե ինչպես են ամերիկացիները հեծանիվի վրա «նստեցնում»  Փաշինյանին, Զելենսկուն և Սաակաշվիլուն, սկսում ես հասկանալ, որ բոլոր կայսրությունները նույն սխալն են գործում:

Ճիշտ է, այդ նկարներում Սաակաշվիլին առանց փողկապի է, իսկ Զելենսկին  փողկապով է, բայց , առանց հեծանվի սաղավարտի, իսկ Փաշինյանը գերազանցիկի պես կատարել է ամերիկացիների բոլոր պահանջները, նկատի ունենք փողկապի և սաղավարտի մասով, բայց միևնույն է, նրանց թվացյալ տարբերությունների մեջ կա մի ընդհանրություն. երեքն էլ իրենց երկրների ազգային շահերի հետ քիչ առնչություն ունեն, որովհետև երեքի առաջ էլ մեկ խնդիր է դրված եղել. անվերապահ կատարել  Գլխավոր Սուվերենի բոլոր պահանջները:

Իսկ հեծանիվը, ըստ Սուվերենի,  պիտի «մարդկային տեսք» տար իրեն սպասարկողներին: Եթե սկզբնական փուլում մարդիկ այդ կուտը ուտում էին, ապա այսօր արդեն բոլորի համար պարզ է դարձել իրականում նրանց ով լինելը:

Զելենսկու «մարդկային դեմքի» դիմաց այսօր ավելի քան կես միլիոն ( 500 000 հազար) ուկրաինացի է զոհվել: Փաշինյանն ավելի «համեստ» թվերով է բավարարվել, «ընդամենը»...  հինգ հազարով: Իսկ Սաակաշվիլին այսօր գտնվում է բանտում, քանի որ այդ երկրում գործել է «աֆղանական սինդրոմը»,  և հանրության մեծ մասը ծանոթ է Սաակաշվիլու՝ ով լինելուն:

Սակայն նույնիսկ այդքանից հետո,  Փաշինյանը  շարունակում է  ցույց  տալ  իր ոչ ադեկվատ լինելը:

Տեսեք,   Զելենսկին արդեն վաղուց հեծանիվ չի քշում: Սաակաշվիլին բնականաբար չի կարող դա անել, քանի որ բանտի պայմանները դա իրեն թույլ չեն տալիս, իսկ ահա՝ Փաշինյանը, կարծես փորձում է հանրությանը հիշեցնել,  իր «կույս» ժամանակների մասին,  մոռանալով, որ այն ժամանակ, դեռ հինգ հազար տղաները ողջ առողջ էին, Արցախը իր տեղում էր, իսկ Հայաստանի սահմանները ոչ ոք կասկածի տակ չեր դնում:

Այսօր, երբ այդ ամենը չկա, Փաշինյանի հեծանվային նոր արկածները, ավելի շատ վկայում են իր մանթրաժի մասին, որովհետև նա հասկացել է, որ նույնիսկ միամիտ հայ հանրությունը արդեն իր և իր Սուվերենի կտերը չի ուտում, և ժամանակն է մտածել այն բանի մասին, թե ինչ անել՝ կոլեգա Սաակաշվիլու վիճակում չհայտնվելու համար, քանի դեռ ժամանակ կա:

Սա՛  է իրականությունը:

Դավիթ Մկրտչյան
Zham.am