Քննիչը որոշել է Գերասիմ Վարդանյանի նկատմամբ 60 մլն դրամ գրավ կիրառել. ահազանգում է փաստաբանը
«Հայաստան» դաշինքի անդամ, դաշնակցական Գերասիմ Վարդանյանի նկատմամբ քննիչը որպես խափանման միջոց է ընտրել գրավը՝ 60 մլն ՀՀ դրամի չափով։ Այս մասին «Փաստինֆո»-ն տեղեկացել է փաստաբան Բենիկ Գալստյանից։
Հիշեցնենք՝ Գերասիմ Վարդանյանը ձերբակալվել է մայիսի 2-ին, Երևանում իրականացվող անհնազանդության ակցիաների ընթացքում։ Ձերբակալությունը, սակայն, վերաբերում է դեռևս 2020թ կապիտուլյացիոն ակտի ստորագրումից հետո իրականացված լայնածավալ բողոքի ակցիաներին։ Հիշեցնենք, որ այն ժամանակ եւս Գերասիմ Վարդանյանը ձերբակալվել էր, ԱԱԾ-ն միջնորդություն էր ներկայացրել՝ նրան կալանավորելու մասին, ինչը մերժվել էր։ Շուրջ երկու տարի անց ԱԱԾ քննիչը փոխել է Վարդանյանին առաջադրված մեղադրանքը և կրկին միջնորդություն ներկայացրել՝ Վարդանյանին կալանավորելու մասին։
Երևանի ընդհանուր իրավասության դատարանը՝ դատավոր Արշակ Մաթևոսյանի նախագահությամբ, երեկ մերժել է կալանավորման միջնորդությունը՝ խափանման միջոցի ընտրությունը թողնելով քննիչի հայեցողությանը, Վարդանյանն ազատ է արձակվել հենց դատական նիստերի դահլիճից։
Այսօր ԱԱԾ քննիչը նույն գործի շրջանակներում Գերասիմ Վարդանյանի նկատմամբ որպես խափանման միջոց է կիրառել 60 մլն դրամի չափով գրավը, որը, սակայն վճարելու համար Վարդանյանը միջոցներ չունի։ Չի բացառվում, որ գրավի 60 մլն դրամի չափ է սահմանվել՝ գրավը չվճարելու պայմաններում հետագայում Վարդանյանին կալանավորելու հարցը բարձրացնելու համար։
«Գրավի 60 մլն դրամի չափը, հաշվի առնելով Գերասիմի ընտանեկան դրությունը, աշխատանքը, վարձատրությունը, ընդհանուր ֆինանսական դրությունը, այդպիսին է։ Գերասիմն ունի երկու մանկահասակ երեխա, որոնք իր խնամքին են, ունի հաշմանդամ եղբայր, որը իր խնամքին է, աշխատում է ԱԺ-ում, ստանում է առավելագույնը 200.000 դրամ աշխատավարձ, ունի վարկեր, չունի՝ արժեքավոր գույք՝ իր տիրապետման կամ տնօրինման տակ։ Այս գործողությունը պարունակում է այն չափը, որ չկարողանա վճարել, այլև՝ ներառում է պատժի տարրեր, ինչն արգելված է՝ թե Սահմանադրությամբ, թե՛ ՄԻԵԴ, Վճռաբեկ դատարանի նախադեպերով»,- նշել է Գալստյանը։