Հոկտեմբերի 11-ին «Զենքի մասին» Արցախի օրենքում որոշակի փոփոխություններ են կատարվել
Հոկտեմբերի 11-ին «Զենքի մասին» Արցախի օրենքում որոշակի փոփոխություններ են կատարվել.
Մամուլում գրում են, որ օրինագծի հիմնավորման մեջ ասվում է, որ պատերազմի հետեւանքով Արցախի Հանրապետության բազմաթիվ համայնքներ դարձել են սահմանամերձ բնակավայրեր եւ որ գտնվելով դեռեւս չկարգավորված հակամարտության մեջ եւ պատերազմի ամենօրյա վտանգի ներքո՝ խիստ անհրաժեշտ է, որ Արցախի Հանրապետությունում քաղաքացիներն ունենան ինքնապաշտպանության անհրաժեշտ մակարդակ ապահովելու հնարավորություն:
Փաստորեն արցախցիների համար դյուրացվել է զենք կրելու թույլտվություն ստանալու ընթացակարգը, հանվել են որսորդական ակոսափող զենք ձեռք բերելու թույլտվություն ստանալու գործընթացում որոշակի սահմանափակումներ եւ այլն...
Արցախի բնակչության անվտանգության ապահովման տեսանկյունից ողջունելի են այդ փոփոխությունները , սակայն այստեղ շատ կարևոր հարցեր են ծագում. ինչ՞ու օրինագծի հեղինակ գերատեսչությունը քաղաքացիների այսպես կոչված ինքնապաշտպանության միջոցների ցանկում չի ներառել նաեւ ատրճանակները, այն դեպքում, երբ Արցախում վերը նշված հիմնավորմամբ` ծանոթ-բարեկամ-կուսակից-համախոհ սկզբունքով և «պարգեւատրում» հատուկ գրիֆով, ատրճանակ ձեռք բերելու թույլտվություններ են բաժանվում... սեմուշկի պես:
Ինչ՞ու օրենքի մեջ փոփոխություն չեք մտցնում եւ ատրճանակ ձեռք բերելու հնարավորություն չեք տալիս իրավապահ մարմինների եւ զինված ուժերի նախկին եւ գործող ծառայողներին եւ, առհասարակ, օրինապաշտ քաղաքացիներին, այն դեպքում, երբ ըստ «օդում կախված լուրերի» պարգեւատրվածների շարքերում կան նաև սպանության եւ այլ հանցագործությունների համար նախկինում դատապարտվածներ, քրեական անցյալ ունեցողներ, ինչպես նաեւ կյանքում զենք չբռնած անձիք եւ տարբեր տրամաչափի պաշտոնյաներ...
Ստացվում է, որ մեզ մոտ ատրճանակ ձեռք բերելու, պահելու և կրելու իրավունքը պատկանում է վերևներում ծանոթներ ունեցող, կամ օրվա քաղաքական իշխանության աջակցողներին եւ սպասարկողներին, այլ ոչ թե երկրին տասնյակ տարիներ ծառայածներին...
Հ.Գ. գրածս չի վերաբերվում հայրենիքի պաշտպանության և անվտանգության ապահովման գործում ցուցաբերած բացառիկ խիզախության և անձնական արիության համար և կյանքին սպառնացող վտանգի պայմաններում ծառայողական կամ քաղաքացիական պարտքը կատարելու համար պարգևատրված տղերքին՝ անկախ նրանց կուսակցական պատկանելությունից և քաղաքական հայացքներից:
Ալեն Ղուլյանի ֆեյսբուքյան էջից