Ինչպես կարելի է բեռնաթափել «Վերին Լարսը». ՌԴ դեսպանը խոսել է հնարավոր ելքի մասին

Ռուս-վրացական սահմանին ավտոմեքենաների կուտակումը լուրջ խնդիր է, այն բավական հաճախ է առաջանում։ Լրագրողների հետ զրույցում այսօր նման կարծիք է հայտնել Հայաստանում Ռուսաստանի դեսպան Սերգեյ Կոպիրկինը։

ՌԴ դեսպանի կարծիքով՝ այդ խնդրի լուծման ուղիներից մեկը կդառնա տարածաշրջանում հաղորդակցության ապաշրջափակումը։

«Սա այն աշխատանքն է, որն իրականացվում է տարածաշրջանում ապաշրջափակման եռակողմ աշխատանքային խմբի շրջանակներում։ Այն հեշտ չէ, բայց, այնուամենայնիվ, կարծում եմ, որ այդ խնդիրների լուծման տեսանկյունից հանձնաժողովն արդյունավետ է գործում»,-ասել է դեսպանը։

Խոսքը Հայաստանի, Ռուսաստանի և Ադրբեջանի փոխվարչապետների կողմից տարածաշրջանում երկաթուղային ուղիների բացման հանձնաժողովի մասին է։ Համապատասխան պայմանավորվածությունը ձեռք է բերվել հունվարի 11-ին Մոսկվայում երեք երկրների ղեկավարների բանակցությունների ժամանակ:

Ինչպես հայտնի է, Ռուսաստանից Հայաստան միակ գործող ցամաքային ճանապարհը` Ստեփանծմինդա-Լարս ավտոճանապարհը, պարբերաբար փակվում է անբարենպաստ եղանակային պայմանների պատճառով։ Արդյունքում Ռուսաստանի և Վրաստանի սահմանին պարբերաբար կիլոմետրանոց հերթեր են առաջանում։ Դա, անշուշտ, հսկայական լոգիստիկ խնդիրներ է ստեղծում Հայաստանի համար։

Ացբյուր` armeniasputnik.am