«Մենք սատանա չենք փնտրել. Խնդիրները բազմաթիվ են՝ մեկ խնդիր էլ Գագիկ Սողոմոնյանն է». ԱԱԾ պետի տեղակալ
Ազգային անվտանգության պետի տեղակալ Տիգրան Հարությունյանի խոսքով՝ Գագիկ Սողոմոնյան ֆեյք էջի բացահայտման ուղղությամբ ԱԱԾ-ն սխալ ուղղությամբ չի գնացել։
«Կարծում եմ՝ էջ մուտք գործելու թույլտվություն ունեն մի քանի անձինք, որոնք և տպավորություն են ստեղծում, որ էջը շարունակում է գործել, որպես Գագիկ Սողոմոնյան առանձին անհատ։ Բազմաթիվ տեխնիկական խնդիրներ կան, որ մենք չենք կարողանում ամբողջական շղթան բացահայտել, սակայն նախաքննությունն ընթանում է, ըստ իս, այդ ամբողջ շրջանակը պարզ կլինի նախաքննության շրջանակներում»,- խորհրդարանում լրագրողների հետ զրույցում ասաց Տիգրան Հարությունյանը։
Անդրադառնալով այն քննադատություններին, որ երկիրն այսօր ունի բազմաթիվ անվտանգային խնդիրներ, իսկ ԱԱԾ-ն ամբողջ թափով լծվել է մեկ ֆեյք բացահայտելու գործին, ԱԱԾ պետի տեղակալն ասաց, որ, երբ ֆեյքն արդեն մտնում է քրեական դաշտ, դա արդեն լուրջ խնդիրներ է առաջ բերում։
«Խնդիրները, իհարկե, բազմաթիվ են, դա խնդիրներից մեկն է, մենք բոլոր ֆեյքերով էլ զբաղվում ենք։ Մենք սատանա չենք փնտրել, պետք չէ չափազանցնել, ԱԱԾ-ն նման գործառույթ չի իրականացրել։ Խնդիրը մեկ ֆեյքով չի սահմանափակվում, խնդիրն ընդհանուր սահմանափակումն էր, որ նշվեց՝ մեդիադաշտում մենք ունենք բավականին ագրեսիվ ստի տարածման փորձեր, ագրեսիվ ձևով տարածում են ակնհայտ ստեր, և հիմա դրանցից մեկն էլ, մեկ խնդիր էլ Գագիկ Սողոմոնյանն էր»,- հավելեց ԱԱԾ պետի տեղակալը։
Աղբյուր՝ 168.am
Հետևեք մեզ Facebook-ում