Երեխաները եւ դեռահասները ավելի հաճախ են կորոնավիրուսով վարակվում, քան տարեցները. հետազոտություն

Երեխաները եւ դեռահասները կորոնավիրուսային ինֆեկցիան զգալիորեն թեթեւ են տանում, բայց նրանց մասնակցությունը համաճարակային գործընթացին չափազանց թերագնահատված է, կարծում են գիտնականները: Իրականում երեխաներն ու դեռահասները, ամենայն հավանականությամբ, կորոնավիրուսով ավելի հաճախ են վարակվում, քան տարեցները:

Նոր հետազոտության հեղինակները վերլուծել են 2020 թվականի ամռան շրջանում ԱՄՆ 6 նահանգներում կորոնավիրուսով վարակման նոր դեպքերի վիճակագրությունը, որտեղ նկատվել է COVID-19-ով հիվանդացության կտրուկ աճ՝ ավելի բարձր մակարդակում հետագա կայունացմամբ:

Այս նահանգներում 10-ից մինչեւ 24 տարեկան դեռահասների եւ երիտասարդների շրջանում կորոնավիրուսային ինֆեկցիայի տարածվածությունը ավելի մեծ է եղել, քան 60-ն անց տարեցների շրջանում: Այսպես՝ Ֆլորիդայում եւ Յուտայում վարակվել էր 15-24 տարեկան բնակիչների 2,2 տոկոսը, մինչդեռ 65 տարեկանից սկսած տարիքային խմբում հիվանդացածների մասնաբաժինը կազմել է ընդամենը 1,1 տոկոս:

Գիտնականների խոսքով՝ այս երեւույթն առաջին հերթին բացատրվում է այն հանգամանքով, որ սոցիալական շփումները դեռահասների շրջանում ավելի շատ են, քան տարեցների. նրանք ավելի հաճախ են հավաքվում ընկերախմբով եւ հաճախում հանրային վայրեր: Դրանից բացի, դեռահասների մեծամասնությունը համոզված է, որ իրենց համար կորոնավիրուսը վտանգավոր չէ, ուստի կանխարգելման միջոցառումների պահպանմանն ավելի անփույթ են վերաբերվում: Մինչդեռ ավագ տարիքի մարդիկ ավելի շատ են մտահոգվում իրենց առողջության համար, հետեւաբար ջանում են կատարել առողջապահության մարմինների բոլոր հանձնարարականները:

news.am