Հայ֊ռուսական բարեկամության նոր կամուրջներ. Քաջարանի համայնքապետարան

Թշնամիներով շրջափակված Սյունիքը չի մեկուսանում, ավելին, մեր առջև ուղեփակոցներ, պատնեշներ, բարիկադներ են դնում, իսկ մենք ծառս լինելով ոստնում ենք դրանց վրայով և մշակութային կամուրջներ կառուցում մեր բարեկամների, դաշնակիցների հետ։ Պարզվում է, մեր մշակութային բնագծերն ավելի ամուր են։

 

Այսօր Քաջարանի Արվեստի դպրոցը հայ֊ռուսական բարեկամությունը խարսխեց մի գողտրիկ միջոցառմամբ։ Առիթը Կանանց միջազգային տոնի մեկնարկն էր։ Նախաձեռնության գաղափարը ի սկզբանե պատկանում էր «Дом Москвы» մշակութագործարարական կենտրոնին, որի գլխավոր տնօրեն Վահրամ Կարապետյանը պատվեց միջոցառումն իր անձնական ներկայությամբ և այս հանդիպումը համարեց հետագա համագործակցության սկիզբ։ Հանդիսությանը ներկա էին նաև Մեղրիում տեղակայված ռուսական զորքերի սպայական կազմի ներկայացուցիչներ։ Հյուրերին ողջունեց Քաջարան համայնքի ղեկավար Մանվել Փարամազյանը։ Պարոն Փարամազյանն իր ելույթում կարևոր շեշտադրումներ արեց օրվա առիթով, նաև նշեց, որ երկուստեք շահավետ է համագործակցության հետագա զարգացումն ու մշակութային աղերսներով ամրապնդումը։ Միջոցառումն ընթացավ ջերմ մթնոլորտում։ Երկու ժողովուրդների բարեկամության և համագործակցության լավագույն ավանդույթները վերականգնվում են։