Սպիտակավոր Սուրբ Աստվածածին վանքի խաչքարը վնասած տղամարդը տվել է խոստովանական բացատրություն

ՀՀ ոստիկանության ձեռնարկած օպերատիվ-հետախուզական միջոցառումների շնորհիվ պարզվել է, որ Երևանի 51-ամյա բնակիչը 2020թ. հոկտեմբերին, քարով քերելով, դիտավորությամբ վնասել է Գլաձոր համայնքում հաշվառված Սպիտակավոր Սուրբ Աստվածածին վանական համալիր հանրապետական նշանակության հուշարձանի հարավային պատի բարձրաքանդակ խաչքարի թևերի վրա քանդակված զարդանախշերը, այս մասին տեղեկացնում է ՀՀ ոստիկանության հասարակայնության հետ կապերի և լրատվության վարչությունը:

Ըստ աղբյուրի՝ փետրվարի 26-ին ոստիկանության Եղեգնաձորի բաժին տեղեկություն է ստացվել, որ Վայոց ձորի մարզի պատմության և մշակույթի անշարժ հուշարձանների պետական ցուցակի՝ Գլաձոր համայնքում հաշվառված Սպիտակավոր Սուրբ Աստվածածին վանական համալիր հանրապետական նշանակության հուշարձանը անհայտ անձը վնասել է:

«Ձեռնարկված օպերատիվ-հետախուզական միջոցառումների շնորհիվ պարզվել է, որ Երևանի 51-ամյա բնակիչը 2020 թ. հոկտեմբերին, քարով քերելով, դիտավորությամբ վնասել էր հուշարձանի հարավային պատի բարձրաքանդակ խաչքարի թևերի վրա քանդակված զարդանախշերը»,- ասվում է հաղորդագրության մեջ:

ՀՀ ոստիկանությունից հայտնում են, որ փաստի առթիվ հարուցվել է քրեական գործ։ Տղամարդը ներգրավվել է որպես կասկածյալ և տվել խոստովանական բացատրություն: Կատարվում է նախաքննություն։

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: