Եվրոբոնդերի մեծ մասը թոշակ ու աշխատավարձ տալու համար է, վերցրել են՝ վճարեն, խայտառակ չլինեն. Միքայել Մելքումյան. Տեսանյութ

2018 թվականից սկսած՝ մինչև 2021 թվականը, բյուջեի ընթացիկ ծախսերը ավելացել են 340-350 մլրդ դրամով, իսկ կապիտալ ծախսերը՝ ընդամենը 50, թե 60 մլրդ դրամով: Այս մասին Tert.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Միքայել Մելքումյանը:

Նա նշեց՝ այնինչ մեր տնտեսական ամբողջ հետհեղափոխական զարգացման պլանը դրված էր, որ կապիտալ ծախսերը պետք է առաջանցիկ տեմպերով զարգանան, քան ընթացիկ ծախսերը: «Կապիտալ ծախսերը ճանապարհներ, ջրամբարներ, ենթակառուցվածքներն են, այն, ինչը  պետք է տնտեսության զարգացման և ներդրումների ապահովման համար: Ընթացիկ ծախսերը թոշակներ,աշխատավարձեր, նպաստներն են, այսինքն` այն, ինչ մեկանգամյա օգտագործման է, երկարաժամկետ չէ: Հիմա ի՞նչ է դուրս գալիս, ելնելով դրանից՝ գալիս ենք նրան, որ հունվարի վերջին են եվրոբոնդերը տեղաբաշխել 3.875 տոկոսադրույքով և տեղաբաշխել են 750 մլն-ի, որովհետև ընթացիկ ծախսերն այլևս հնարավոր չէին անել»,- ասաց նա:

Մելքումյանը հիշեցրեց՝ մինչև այդ եվրոբոնդերի թողարկելը բազմիցս է ասել՝ կարճ ժամանակ անց թոշակ ու աշխատավարձ չեն կարողանալու տալ: «750 մլն դոլարի եվրոբոնդերի մեծ մասը, ես հասկանում եմ, ընթացիկ ծախսեր ապահովելու համար է: Այսինքն՝ դու փող ես վերցնում, որ թոշակ ու աշխատավարձ տաս: Ստացվում է՝ այդ փողը չես կարողանում դու աշխատես, դրսից վերցնում ես, քո պետական պարտքը ավելացնում ես: Եթե մեր պարտքի շեմը ՀՆԱ-ի նկատմամբ հիմա մոտ 60 տոկոսի սահմաններում է, տարվա վերջին լինելու է 73 տոկոսի սահմաններում»,- ասաց նա:

Մելքումյանը նկատեց՝ այդ 750 մլն-ը շատ արագ ծախսվելու է: «Բյուջեի ծախսերի մեջ 100 մլրդ դրամի չափով մեկ օրվա մեջ ծախս է կատարվել: Փորձելու եմ պարզել, թե այդ 100 մլրդ-ն ինչի վրա է գնացել»,- ասաց նա: Պատգամավորի խոսքով՝ թվում է, թե այդ վերցրած եվրոբոնդերի 3.875 տոկոսը շատ լավ տոկոս է, բայց այդքան էլ ցածր չէ: «Ուրիշ երկրներ կան՝ 2 - 2.5 տոկոս են վերցնում, գուցե կարելի էր դա 2.5 տոկոսով անել, այդ տոկոսն ի վերջո ո՞վ պետք է վճարի, մենք՝ բոլորս, չէ՞»,- նկատեց նա:

Հարցին՝ ինչպես են այդ դեպքում այստեղ դրական բան տեսնում, Մելքումյանը նշեց՝ դրականն այն է, որ փող չկա, վերցրել ես: «Այսինքն՝ եթե այդ փողը չլինի, ընդհանրապես կոլապսային վիճակի մեջ կընկնենք: Պետք է հասկանանք պարտքը 70-ից անցնո՞ւմ է,  քո ստեղծած ՀՆԱ-ն կատաստրոֆիկ թվերի է, գուցե մեկ տարի հետո էլ դառնա 90 տոկոս. ո՞ւր ենք գնում և ինչ ենք թողնում, դրա համար կյանքը ցույց տվեց բոլոր ոլորտներում կլինի անվտանգային, սոցիալական, տնտեսական ներդրումային, համատարած ձախողում է գնացել, ու դա շարունակվում է: Մեր ասածները ճիշտ էին, որ ասում էինք՝ կոլապս է, չես կարողանալու թոշակ, աշխատավարձ տաս, այո, դրա համար ինքը դրսից միանգամից վերցրեց, որ խայտառակ չլինի, այդ թոշակ-աշխատավարձը կարողանա տա»,- ասաց նա:

Մանրամասները՝ Tert.am-ի տեսանյութում: