Եթե մենք տալիս ենք Մեղրիի երկաթուղին Ադրբեջանի կողմից շահագործման համար, ապա դա մեր շահերին հակասում է. Գագիկ Աղաջանյան

Հնարավոր է, որ լինեն խորհրդակցություններ, բայց ոչ մի կոնկրետ գործողություն, քայլ ճանապարհների ապաշրջափակման, վերաբացման կամ նորերի կառուցման ուղղությամբ չի կարող լինել, քանի դեռ ռազմագերիների վերադարձի հարցը չի լուծվել, այսօր հրավիրված մամուլի ասուլիսի ժամանակ նշեց «Ապավեն» բեռնափոխադրող ընկերության ղեկավար Գագիկ Աղաջանյանը: Փոխանցում է Tert.am-ը։ 

«Չի կարող լինել տնտեսական համագործակցություն, երբ այդպիսի զգայուն հարցում, ինչպիսին է գերիների կամ աճյունների վերադարձը, չենք կարողանում ընդհանուր հայտարարի գալ»,- ասաց նա:

Խոսելով ճանապարհների ապաշրջափակման դրա հետ կապված մտահոգությունների մասին Գագիկ Աղաջանյանն ասաց, որ առաջին հայացքից թվում է, որ ոչ մի վատ բան չկա ճանապարհ բացվելու մեջ։ «Բայց մեր դեպքում ես կողմ եմ, որ ամեն մի ճանապարհ կոնկրետ դիտարկվի, քննարկվի դրա վերագործարկման նպատակահարմարությունը, նրա դերը, նշանակությունը մեր տնտեսության մեջ: Ասել, որ դե ճանապարհ բացվելը բոլորի համար լավ է, ես չեմ կիսում այդ տեսակետը: Օրինակ, ճանապարհ կա, որը մեզ տանում է վերջնական ճանապարհային մեկուսացման»,– ասաց նա:

Գագիկ Աղաջանյանի համոզմամբ՝ այսօր դեռ վաղ է քննարկել Հորադիզ-Մեղրի-Նախիջևան-Երևան հաղորդակցության մասին խոսելը։

«Դա վերջին թեման է տրանսպորտային հաղորդակցությունների ապաշրջափակման առումով մեզ համար անթույլատրելի է դա քննարկելը: Եթե խոսքը տրանսպորտային ուղիների ապաշրջափակման մասին է, ապա մենք այսօր ունենք կոմունիկացիաներ, որոնք հենց այսօր կարող են շահագործվել, ինչո՞ւ դա թողած խոսում են նոր ճանապարհների կառուցման մասին: Այսինքն՝ Հորադիզից մինչ Հայաստանի սահման ճանապարհը չի վերականգնվում, այլ կառուցվելու է նոր ճանապարհ: Եթե մենք տալիս ենք Մեղրիի երկաթուղին, իրենց կողմից շահագործման համար, ապա դա մեր շահերին հակասում է»,- ընդգծեց նա՝ նկատելով, որ մինչև Հայաստանի շրջափակումը Հայաստանի ճանապարհների խաչմերուկ էր, բոլոր երկրներն իրար հետ կապվում էին Հայաստանի տարածքով:

Աղբյուր՝ Tert.am