Ազգ-բանակի հեռանկարը

Պաշտպանության նախարար նշանակվելուց հետո Վիգեն Սարգսյանն առաջ քաշեց ազգ- բանակի կոնցեպցիան։ Եթե հանում ենք պաշտոնական քծնողներին՝ իրենց դատարկախոսությամբ, ապա տակը մնում է հետաքրքիր, բայց առայժմ չդետալայնացված գաղափար։ Ակնհայտ է, որ բանակի եւ անվտանգության ողջ համակարգի ռեֆորմացիան պետության առաջ կանգնած սուր խնդիրներից մեկն է։

Մեծ հաշվով, ազգ-բանակն ունի երկու հեռանկար.

ա. վերածվել հերթական PR ծրագրերից մեկին,

բ. դառնալ խորքային բարեփոխումների կոնցեպցիա։

Ազգ-բանակ գաղափարի հաջողության համար առաջին հերթին անհրաժեշտ է լավ մենեջմենթ, լավ ծրագիր եւ երկրորդ՝ հասարակության մասնակցություն։ Եթե հասարակությունը չդառնա այս գաղափարի սեփականատերը, ապա այն ոչ մի հաջողություն չի ունենա։ Այն կմնա ազգ-ՀՀԿ մակարդակին, ինչն ակնհայտորեն Վիգեն Սարգսյանի պլանների մեջ չի մտնում։
Ազգ-բանակ 2017 միջոցառմանը նախարարը առաջ քաշեց երկու նոր ծրագիր։ Դրանք հետաքրքիր են, դրանք ունեն քննարկման կարիք, դրանք ունեն փորձագիտական վերլուծության անհրաժեշտություն եւ դրանք, անկասկած, ունեն ավելի կատարելագործվելու հնարավորություն։

Մյուս կողմից, շատ դժվար է հանրությանը համոզել, որ Մանվել Գրիգորյանի կամ Հայկազ Բաղմանյանի մասնակցությամբ հնարավոր է որեւէ առաջադիմական ռեֆորմ։
Գործին անիմաստ ջրիկություն է տալիս նաեւ փոքրիկ երկրապահուհիների եւ այլ զուռնադհոլավորների առկայությունը։ Լուրջ խնդիրները, կարծում ենք, անհրաժեշտ է քննարկել լուրջ մթնոլորտում։

Ի դեպ, հրավիրվածների մեջ չկային իշխանության տիրույթից դուրս գտնվող, բայց շահագրգիռ ու կոնստրուկտիվ շրջանակները։
Փոխարենը առաջին շարքերում էին պաշտոնական քծնողները, միատիպ ներկած չոլկաներով դպրոցների տնօրենները, իրենց վարքով եւ կենսակերպով բանակը հասարակությունից հեռացրած գեներալները։

Հիմա ամենակարեւոր հարցը հետեւյալն է. հասարակության ո՞ր շերտը կդառնա գաղափարի կրողը եւ գաղափարի քարոզիչը։ Եթե այս գործը մնաց հհկ-ական տնօրեններին, ապա այն դատարկ հայրենասիրական երեկույթներից այն կողմ չի անցնելու։ Դասասենյակներին պատերին կկախվեն Վիգեն Սարգսյանի նկարները եւ աշակերտներին կհանձնարարվի արտասանել վերջինս կենսագրությունը։ Հուսանք՝ սա չէ այն ցանկալի հանգրվանը, որին ձգտում է նախարարը։

Վահրամ Գեւորգյան

Աղբյուր՝ «Top-News.am»