«Փաշինյանն ակնկալում է գործող քարոզչամեքենայով և վարչական ռեսուրսներով հաղթել ընտրություններում և իշխանության մնալ մինչ 2026թ.». Коммерсантъ

Նիկոլ Փաշինյանը, որը մինչ այս ցուցարարներին զիջումներ անելու պատրաստակամություն չի ցուցաբերել, ուրբաթ օրն անսպասելի քայլի դիմեց: Նա պատրաստակամություն հայտնեց 2021 թվականին արտահերթ խորհրդարանական ընտրություններ անցկացնել, իսկ մինչ այդ՝  հրավիրել երկրի բոլոր քաղաքական ուժերին խորհրդակցությունների: Միևնույն ժամանակ, ինքը՝ Փաշինյանը, վստահ է, որ իր համերկրացիների մեծամասնությունը դեռ աջակցում է իրեն ՝ չնայած վերջերս Լեռնային Ղարաբաղում հայկական կողմի ցավալի պարտությանը, գրում է Коммерсантъ-ը:

Ուրբաթ երեկոյան ֆեյսբուքյան հայտարարության մեջ Նիկոլ Փաշինյանը հայտարարեց 2021 թվականին արտահերթ խորհրդարանական ընտրություններ անցկացնելու պատրաստակամության մասին: Եվ նա հրավիրեց Հայաստանի «խորհրդարանական և շահագրգիռ արտախորհրդարանական ուժերին» այս հարցի շուրջ խորհրդակցությունների:

Փաշինյանի հայտարարությունից հետևեց, որ այս ընտրություններում ընդդիմության հաղթանակը բնավ երաշխավորված չէ. ավելին, նա պատրաստ է «ապագայում ժողովրդի վստահությունը հաստատվելու դեպքում, շարունակել Հայաստանի ղեկավարումը այս դժվարին շրջանում»: Միևնույն ժամանակ, ըստ Նիկոլ Փաշինյանի, իր պաշտոնանկության ընդդիմության պահանջը համաժողովրդական աջակցություն չի ստացել, այլապես նրանք վաղուց էին հավաքել շատ ավելի մեծ բողոքի ակցիաներ:

Միևնույն ժամանակ Փաշինյանը շեշտել է. «Ես կառչած չեմ վարչապետի աթոռից»: Նա հավաստիացրել է, որ պատրաստ է թողնել իր պաշտոնը, «եթե այդպիսին է ժողովրդի որոշումը»: Եվ միայն այս դեպքում:

Բելառուսի նախագահ Ալեքսանդր Լուկաշենկոն արդեն մի քանի ամիս է, ինչ օգտագործում է նման ձևակերպում ՝ բազմիցս հայտարարելով, որ «միայն բելառուսական ժողովուրդը» կարող է հեռացնել իրեն իշխանությունից:

Հիմա հարցն այն է, թե արդյո՞ք ուրբաթօրյա զիջումը Նիկոլ Փաշինյանից կբավարարի ընդդիմադիրներին, որոնք պահանջում են Փաշինյանի անհապաղ հրաժարականը՝ վարչապետի պաշտոնում առաջադրելով իրենց թեկնածուին ՝ երկրի կառավարության նախկին ղեկավար Վազգեն Մանուկյանին:

Հայ քաղաքագետ Հրանտ Միքայելյանը վստահ է, որ պատահական չէ այն փաստը, որ ընտրությունների անցկացման նախաձեռնությունը բխում էր հենց Փաշինյանից:

«Փաշինյանը գիտի՝ Հայաստանում հաղթում է նա, ով անցկացնում է ընտրությունները», -ասել է զրուցակիցը:

Եվ, հետևաբար, գործող քարոզչական մեքենայով և իր տրամադրության տակ գտնվող վարչական ռեսուրսները մոբիլիզացնելու ունակությամբ նա ակնկալում է, որ կկարողանա հաղթել ընտրություններում: Եվ, այդպիսով, կուժեղացնի իր իշխանությունը և կպահի այն մինչև 2026 թվականը:

Միևնույն ժամանակ, Ռուսաստանի գիտությունների ակադեմիայի Համաշխարհային տնտեսության և միջազգային հարաբերությունների ինստիտուտի Հետխորհրդային հետազոտությունների կենտրոնի ավագ գիտաշխատող Ստանիսլավ Պրիտչինը համաձայն չէ վերոհիշյալ տեսակետի հետ:

«Առայժմ Փաշինյանն ունի բնակչության մանդատը, բայց իր ոչ ժողովրդականության պատճառով նա կպարտվի ցանկացած հետագա ընտրությունում:Այնպես որ, նրա համար այժմ հիմնական խնդիրն է հնարավորինս շատ ժամանակ շահելը՝  մինչ արտահերթ ընտրությունների պաշտոնական հայտարարությունը»,-ասել է Պրիտչինը:

Ըստ փորձագետի, «ամանորյա տոնրից առաջ հայտարարելով արտահերթ ընտրություններին իր հավանական համաձայնությունը՝  Նիկոլ Փաշինյանն այդպիսով որոշումը տեղափոխում է նոր տարի և, միգուցե, նա կկարողանա հետաձգել ընդդիմության հետ բանակցությունները այս հարցի շուրջ մինչ հունվար, կամ նույնիսկ մինչ փետրվար»,-եզրափակել է փորձագետը:

Թարգմանությունը՝ Tert.am-ի: