Կիմի սերը Հայրենիքն էր, ինքը բժիշկ էր, իր գործը՝ կյանքեր փրկելը, բայց գնաց իր կյանքը տվեց հայրենիքին. պատմում է Կիմ Խաչատրյանի եղբայրը

Կիմը ամեն տեղ Հայաստանի Հանրապետության դրոշով էր, դրոշն իր սենյակի պատին փակցված էր, նաև մեքենայի մեջ ուներ դրոշ, նրա սերը Հայրենիքն էր, Tert.am-ի հետ զրույցում պատմում է կամավորագրված և Հայրենիքի պաշտպանության համար զոհված (ծնվել է 1995 թվականի մարտի 17-ին) ՀՅԴ անդամ Կիմ Խաչատրյանի եղբայրը` Սոս Խաչատրյանը:

Կիմը Արենիից էր, սովորում էր Երևանի պետական բժշկական համալսարանի հինգերորդ կուրսում: «Կիմը բժիշկ էր, բայց ինքը սպիտակ խալաթով չգնաց պատերազմ, ինքը գնաց ավտոմատով, գնաց որպես զինվոր: Իր գործը կյանքեր փրկելն էր, բայց գնաց իր կյանքը տվեց հայրենիքին: Գնաց որպես զինվոր իր պարտքը տալու, իմ պարտքը տալու, մեր պարտքը տալու: Ես իր մեծ եղբայրն եմ, և ինքը ինձանից առաջ ընկավ: Ինձ ասում էր՝ դու երեխա, կին ունես, դու մնա, ես կգնամ: Ինքը ավելի ուժեղ էր, քան ես: Կիմը չսպասեց, որ իրեն կանչեն, զգաց, որ իր կարիքը կա ու գնաց»,-ասաց նա:

Կիմը կռիվ է գնացել հոկտեմբերի 12-ին, նա ջոկատի հրամանատար էր, զոհվել է ականանետի հարվածից՝ հոկտեմբերի 31-ին: «Երկու, երեք օրը մեկ խոսում էինք, մի երեք օր չէր զանգել և երբ զանգեց, ասացի, որ անհանգստանում էի, ինքն էլ ասաց, որ դրա համար ամեն օր չզանգեմ, որ տենց չանհանգստանաս: Վերջին անգամ հոկտեմբերի 30-ին զանգեց, հեռախոսը թողել էր մոտս և բոլոր ծանոթների համարներն ուզեց: Իրենք զրոյից դիրքեր են սարքել, արդեն նահանջած դիրքեր է եղել և իրենք խրամատ են քանդել, հենակետ են սարքել, և արդեն բուժկետ սարքելու ընթացքում ականանետի հարվածից զոհվել է»,-ասաց նա։

Սոս Խաչատրյանը նշեց, որ զոհվել է նաև դասակի հրամանատարը, վիրավորվել է բժիշկը և մեկ կամավորական: Զոհվելուց հետո Կմի գրպանից գտել են եղբոր հեռախոսահամարը և մեկ փամփուշտ, որը պահել էր իր համար, եթե հանկարծ գերի ընկներ։

«Դաշնակցության ուսանողական խմբից 97 հոգի կամավորագրվեցին, 96 հոգին վերադարձան, մենակ Կիմը զոհվեց: Գնալուց, երբ հրաժեշտ էինք տալիս, մեր հայրիկին չթողեց, որ գրկի, ասաց` հայրիկ գիտես չէ՞ ուր եմ գնում, ամեն ինչին պատրաստ կլինես, ասաց ու գնաց»,- ասաց եղբայրը և նշեց, որ Կիմը այնքան շատ ընկերներ ուներ, որ զարմանում էին, թե ինչպես է հասցնում բոլորին ժամանակ տրամադրել։ Կիմի ընկերների մի մեծ մասին էլ նրա զոհվելուց հետո են ճանաչել:

Սոսը պատմեց, որ Կիմն ատամնաբույժ էր, իսկ իրենց հորեղբոր տղան՝ ատամնատեխնիկ։ Նրանք ծրագրել էին Արենիում բացել ատամնաբուժարան և միասին աշխատել, շինարարությունն արդեն սկսել էին, սակայն կիսատ մնաց:

«Ինքը պետք է լիներ լավագույն մասնագետ, պետք է վերապատրաստվեր և որպես լավագույն մասնագետ գար: Հայրիկս անընդհատ ասում էր՝ պետք է Կիմին շուտ ամուսնացնենք, ես էլ ասում էի՝ թող չշտապի: Մեծ երազանքներ ունեի իմ մեջ Կիմի հարսանիքի հետ կապված, նրա ընտանիքի հետ կապված, ամեն ինչ կիսատ մնաց»,-ասաց եղբայրը:

Կիմը մինչ կռիվ գնալը գրառում էր կատարել իր ֆեյսբուքյան էջում. «Բախտը մեկն է զինվորի` կա՛մ մահ, կա՛մ ազատություն»:

Իսկ ավելի վաղ, երբ դեռ չէր մեկնել կռիվ, շնորհավորելով ուսուցչի օրվա կապակցությամբ հորը, ով ռազմագիտության ուսուցիչ է, հրապարակել էր լուսանկարել և գրել. «Ուսուցչի օրը ... Իմ կյանքին սթափ նայելու ու հայրենիքի հանդեպ պարտքի զգացում սերմանած ուսուցիչ։ Քո դասերից է, որ հիմա ամաչում եմ քաղաքացիական հագուստով ման գալ»:

Աղբյուր՝ Tert.am