Պետբյուջեում պետք է զոհված և հաշմանդամ զինծառայողների համար գումար նախատեսել, ոչ թե ավելացնել հիմնադրամներ ուղղվող գումարները. Սուրեն Պարսյան

Կարծում եմ, որ Կառավարությունը ոչ թե առանձին ուղղություններով հիմնադրամներ պետք է բացի կամ ավելացնի դրանց ուղղվող գումարները, այլ իր պետական բյուջեում նախատեսի համապատասխան տող և այդ գումարը հատկացնի այդ տողով, ինչպես թոշակառուների, նպաստների դեպքում է: Tert.am-ի հետ զրույցում նման կարծիք հայտնեց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը՝ անդրադառնալով Զինծառայողների ապահովագրության հիմնադրամին ամսական վճարների բարձրացման առաջարկին:

«Ինչպես, օրինակ, թոշակառուների, նպաստների դեպքում կա հստակ տող, որ ամեն տարի այսքան գումար է հատկացվում այս ուղղությամբ: Կարծում եմ՝ Կառավարությունը այս հարցի լուծումը ևս նման ձևով պետք է տա, առանձին մարմիններ, հիմնադրամներ ստեղծելու կարիք չկա: Եվ կառավարությունը պետք է պրոգրեսիվ հարկային քաղաքականության անցնի՝ շատից շատ, քչից քիչ սկզբունքով: Եվ այս բոլոր հարցերը կլուծվեն»,- ասաց նա:

Տնտեսագետի խոսքով՝ եկամտահարկի պրոգրեսիվ հարկման մոդելից համահարթին անցնելուց հետո այս տարի Կառավարությունը բարձր աշխատավարձ ստացողներին և խոշոր հարկատուներին զիջել է 30-40 մլրդ դրամ: Հիշեցնենք, որ եկամտահարկի պրոգրեսիվ մոդելով մինչև 150 հազար դրամ աշխատավարձ ստացողները վճարում էին 23 տոկոս եկամտահարկ, 150 հազարից 2 մլն դրամ ստացողները՝ 28 տոկոս, 2 մլն գերազանցող աշխատավարձ ունեցողները՝ 36 տոկոս: Ներկա համահարթ մոդելով բոլորը վճարում են 23 տոկոս եկամտահարկ:

«Բնականաբար, այս գումարը բավականին մեծ է (համահարթեցումից հետո զիջված գումարը – Tert.am): Համեմատության համար նշեմ, որ 2017 թ. առ այսօր հիմնադրամում (Զինծառայողների ապահովագրության – Tert.am) հավաքվել է մոտ 30 մլրդ դրամ: Այսինքն՝ մենք այս տարի 30-40 մլրդ դրամ ուղղակի զիջել ենք հարուստներին և բարձր աշխատավարձ ստացողներին: Սոցիալական արդարության տեսակետից խնդիր ունենք այստեղ: Պետք է ավելի արդար համակարգ մշակենք»,- ասաց Սուրեն Պարսյանը:

Աղբյուր՝ Tert.am