Արցախից Երևան տեղափոխված երկու զինվորի վիճակը ծայրահեղ ծանր է
Երեկ` հունվարի 24-ին, Պաշտպանության բանակի երկու զինծառայող է Երևան տեղափոխվել, որոնց վիճակը գնահատվում է ծայրահեղ ծանր: Այս մասին այսօր լրագրողների հետ հանդիպմանը հայտարարել է ՀՀ զինված ուժերի ռազմաբժշկական վարչության պետ, գնդապետ Կամավոր Խաչատրյանը՝ նշելով, որ զինվորներն այս պահին Կենտրոնական կլինիկական հոսպիտալում են:
Վիրավոր զինծառայողներից մեկը պայմանագրային զինծառայող Ալեքսեյ Ավանեսյանն է, ով ստացել է ստորին վերջույթի վիրավորում:
«Ծնկի շրջանում ոսկրային դեֆեկտով վիրավորում է ստացել: Վիրահատել ենք և ստիպված ենք եղել հեռացնել մեկ ստորին վերջույթը: Վիճակը ծայրահեղ ծանր է, սակայն կայունություն է նկատվում: Փորձել ենք սկզբնական շրջանում ստորին վերջույթը պահպանել, սակայն վնասվածքը մեծ էր և չի հաջողվել»,-ասել է Կամավոր Խաչատրյանը:
Երկրորդ զինվորը՝ Գուրգեն Հարությունի Սարգսյանը, իրենց մոտ է տեղափոխվել գլխուղեղի շրջանում ստացած վնասվածքով: Խաչատրյանի խոսքով, վիրավորումը լուրջ է, այժմ երիտասարդին միացված է արհեստական ապարատ: Բժիշկներն ամեն ինչ անում են զինվորի կյանքը փրկելու համար:
Zham.am
Լուսանկարը՝ Արմենպրեսի:
Հետևեք մեզ Facebook-ում