«Կոնվերսբանկ»-ի խորհրդի նախագահի չստեղծած ընկերությունը Դալմայի այգիներին և Երևանին «նվեր» է պատրաստում. Տեսանյութ

Երևանի Դալմայի այգիների տարածքում խոշոր կառուցապատողներից է «Կոնվերսբանկ»-ի խորհրդի նախագահ, «Տեր-Տաճատյան» իրավաբանական ընկերության տնօրեն, Հանրային խորհրդի անդամ Արմեն Տեր-Տաճատյանը։ Նա Ծիծեռնակաբերդի խճուղու և Մոնթե Մելքոնյան փողոցի մեջտեղում իրեն պատկանող 2.5 հա հողակտորի վրա տեղեկատվական տեխնոլոգիաների ոլորտի աշխատակիցների համար նախատեսված համալիր է կառուցելու։

Բերքատու այգիներին կփոխարինի 16 հարկանի շինությունը

Ամուսիններ Մանուշակ Բաղդասարյանն ու Կոստյա Հակոբյանը կրակի վրա օղու թորման աշխատանքներին են հետևում։ 60 ծիրանենիներից ստացած բերքը վաճառել են, հիմա էլ թափուկից օղի են ստանում։ Ափսոսում են՝ թափեն։ Դալմայի այգիների այս հատվածում ամուսինները 4000 քմ այգի ունեն, որը մշակում են 1994 թվականից։ Գիտեն, որ Դալմայի այգիների տարածքը բաժանվում է հատվածաբար, բայց որ իրենց տարածքն էլ է ներառվել Տեր-Տաճատյանի շինարարության մեջ, տեղյակ չէին։

Դալմայի այգիների կառուցապատումը. 15 հարկանի շենքերով թաղամասի շինարարությունը սկսվել է

Խնձորները որոշ ժամանակ անց կհասունանան։ Թզենիներն ու խաղողի վազերը ծանրացել են բերքից։ Տիկին Մանուշակը հպարտանում է՝ ոսկեհատ տեսակի խաղողը Դալմայի այգիներում եղած լավագույն տեսակներից է, որն ինքը մինչ օրս պահպանել և շատացրել է։

«Մենք էս հողից, սերմից, կորիզից ծառ ենք աճեցրել։ Առաջին դասարանցի երեխայի հետ ո՞նց եմ խոսել, նրան ընթացք, ուղի ցույց տվել, էս ամեն ծառի, թփի հետ խոսել եմ էդպես։ Ես էս հողը 28 տարի մշակում եմ»,- ասում է տարրական դասարանների նախկին մանկավարժ Մանուշակ Բաղդասարյանը։

Անաստասավանում ապրող 10 հոգանոց նրանց ընտանիքը տարիներ շարունակ հենց այս այգու բերքի շնորհիվ է ապրել, քանի որ հիմնական աշխատող ընտանիքում չունեն։ Ստացված բերքն իրացնում են Շինարարների փողոցում գտվող փոքրիկ շուկայում։

Հողերի, այնուհետև ջրօգտագործման վճարների կտրոնները այգու մշակողները պահպանել են։ Մինչ օրս էլ ոռոգման ջրի համար վճարում են, բայց այս տարի ջուրը հողօգտագործողներին կանոնավոր չի տրամադրվում։ Տիկին Մանուշակն ասում է, որ միտումնավոր են կտրում ջուրը, որ այգիները չորանան, և մարդիկ հիասթափվեն ու ինքնաբերաբար լքեն տարածքները։ 

Ի՞նչ է կառուցելու գոյություն չունեցող ընկերությունը

Արմեն Տեր-Տաճատյանը 3 առանձին կտորից բաղկացած տարածքի նկատմամբ սեփականության իրավունք ունի։ Հողհատկացման որոշումը կայացրել է Կառավարությունը՝ 2019թ․ մայիսի 30-ին։

Այդ որոշմամբ Կառավարությունը հավանություն է տվել տեխնոլոգիական հագեցվածության շենքային համալիրի կառուցման ներդրումային ծրագրին և ուղղակի վաճառքով նրան է օտարել Ծիծեռնակաբերդի խճուղի 33 հասցեին հարակից համայնքային սեփականություն հանդիսացող՝ 1.4 հա (1.3+0.1) մակերեսով հողամասը, որի կադաստրային արժեքը գնահատվել է մոտ 99 մլն դրամ։ Այսինքն՝ 1 քմ-ի արժեքը 7000 դրամի սահմաններում։ 

 

Բացի դրանից, Կառավարությունը նրան է տրամադրել «Հողային օրենսգրքի» 60-րդ հոդվածով նախատեսված 

սահմանափակումների ցանկում ընդգրկված 0.2605 հա հողամասը՝ ուղղակի ձևով կառուցապատման իրավունքով՝ որպես պետություն-համայնք-մասնավոր համագործակցություն։

«Հողային օրենսգրքի» 60-րդ հոդվածը թվարկում է այն հողերի ցանկը, որոնք քաղաքացիներին և իրավաբանական անձանց չեն կարող փոխանցվել սեփականության իրավունքով։ Այդ ցանկում ընդգրկված 0.2605 հա հողը Արմեն Տեր–Տաճատյանին 99 տարով կառուցապատման իրավունքով փոխանցելուց բացի՝ Կառավարության նույն որոշման մեջ սահմանվել է, որ հողամասը կարող է օտարվել ուղղակի վաճառքի ձևով, 60-րդ հոդվածով նախատեսված սահմանափակումների մեջ գտնվող հողամասերի ցանկից դուրս գալու դեպքում։

Կառավարության որոշման կատարումն ապահովող՝ Երևանի քաղաքապետ Հայկ Մարությանի 2019 թ․-ի հուլիսի 22-ի որոշման մեջ էլ նշված, է որ «0.2605 հա մակերեսը (բարձրավոլտ էլեկտրահաղորդալարերի անվտանգության գոտու սահմաններում է) ընդգրկված է նույն օրենսգրքի 60-րդ հոդվածի սահմանափակումների ցանկում և ըստ տարածագնահատման համաձայնեցված սխեմայի՝ գտնվում է 6-րդ գոտում»։

Քաղաքապետի նույն որոշման մեջ նաև նշված է՝ 0.2605 հա մակերեսով հողամասը կառուցապատման իրավունքով, 99 տարի ժամկետով տրամադրել Արմեն Տեր-Տաճատյանին՝ տարեկան վարձավճար սահմանելով տվյալ հողամասի կադաստրային արժեքի 5 տոկոսի չափով:

Այսինքն՝ Արմեն Տեր-Տաճատյանին կառուցապատման իրավունքով փոխանցված 0.26 հա հողակտորի վրայից, եթե ինչ-որ մի ժամանակ հանվեն բարձրավոլտ էլեկտրահաղորդալարերը, այդ հողը նույնպես կդառնա նրա սեփականությունը։

Արմեն Տեր-Տաճատյանն իր ներդրումային ծրագրով խոստացել և պարտավորվել է Երևան համայնքին նվիրել 300 քմ աշխատանքային (գրասենյակային) տարածք՝ վերանորոգված վիճակում։ Բացի այդ, խոստացել է 130 մլն դոլար ներդնել, շինարարական աշխատանքներն ավարտել հողահատկացումից 48-54 ամսվա ընթացքում (մինչև 4.5 տարի)։ Կառավարության որոշման հիմնավորումներում արձանագրվել է, որ ծրագրի իրականացման համար պետք է հիմնադրվի «Դալան թեքնոլոջիս» ՓԲԸ-ն, որը մեկ տարի անց դեռևս չի ստեղծվել։

Ավելի վաղ՝ 2008թ․-ին 0,82 հա տարածք Արմեն Տեր-Տաճատյանն արդեն ձեռք էր բերել նույն տեղում, իսկ 2013-ին հողամասի սահմաններն է վերաճշտել, նոր հատակագիծ ստացել։ Այդպիսով, Տեր-Տաճատյանի ամբողջ հողատարածքն այժմ կազմում է 2,5 հա։

«Դալան թեքնոլոջիս» ՓԲԸ-ն դեռ չստեղծված՝ հողակտորների սեփականատեր Արմեն Տեր–Տաճատյանը դիմել և Երևանի քաղաքապետ Հայկ Մարությանից ստացել է նախագծման թույլտվություն (ճարտարապետահատակագծային առաջադրանք)։ Ըստ այդ փաստաթղթի՝ 4 առանձին մասերից բաղկացած, բայց ընդհանուր 2․5 հա մակերեսով հողակտորի վրա կառուցապատելու համար պետք է մշակել բազմաֆունկցիոնալ շենք։

«Կառույցի վերգետնյա ծավալը հողամասի վերին նիշից նախատեսել մինչև 16 վերգետնյա հարկերով, առավելագույն բարձրությունը համահարթեցման նիշից ընդունել 77.80 մ։ Հողամասի ռելիեֆային առանձնահատկությունից ելնելով՝ հնարավոր է նկուղային և կիսանկուղային հարկեր, որոնք միմյանց նկատմամբ հնարավոր է նախագծել աստիճանաձև հորինվածքով»,– ասված է թույլտվության մեջ, որտեղ նաև նշված է, որ նախագիծը պետք է համալիր փորձաքննության ենթարկվի, այդ թվում՝ պետք է գնահատվի շրջակա միջավայրի վրա ազդեցությունը։

Մինչ Արմեն Տեր-Տաճատյանը քաղաքապետարանին կներկայացնի կառուցվելիք շինության նախագիծը և շինթույլտվություն կստանա՝ «City Studio»-ն իր յութուբյան էջում տեղադրել է կառուցվելիք շենքի եռաչափ մոդելավորմամբ տեսանյութը։

Մանրամասները՝ «Հետք»-ում