Կարեն Կարապետյանը քվեարկության էր եկել կնոջ հետ ( Տեսանյութ¸ Ֆոտո)

Հայաստանի վարչապետ Կարեն Կարապետյանը այսօր՝ ապրիլի 2-ին, խորհրդարանական ընտրություններում քվեարկել է թիվ 4 ընտրական տարածքի 53 ընտրատեղամասում: Այդ մասին հաղորդում է NEWS.am թղթակիցը:

Կարեն Կարապետյանը քվեարկության էր եկել կնոջ հետ:

Քվեարկությունից հետո անդրադառնալով ՀՀԿ-ի հաղթանակի շանսերին, Կարեն Կարապետյանն ասաց. «Ժամանակը ցույց կտա: Ուզում եմ՝ ամեն ինչ խաղաղ լինի, համերաշխ եւ հանդուրժող»:

Նշենք, որ այսօր՝ ապրիլի 2-ին Հայաստանում խորհրդարանական ընտրություններ են ընթանում։ 2015թ. դեկտեմբերին կայացած հանրաքվեով ընդունված Սահմանադրությամբ Հայաստանի 6-րգ գումարման Ազգային ժողով են անցնելու առնվազն 105 պատգամավորներ (նրանցից 4-ը՝ ազգային փոքրամասնություններին տրվող հատուկ քվոտաներով)։ Ընտրությունների համար ՀՀ տարածքում բացվել են 2009 ընտրատեղամասեր։

2017թ. ապրիլի 2-ի խորհրդարանական ընտրությունները միակ համապետական ընտրություններն են առաջիկա հինգ տարիների ընթացքում, քանի որ, նույն սահմանադրական բարեփոխման համաձայն, Հայաստանը դառնում է խորհրդարանական հանրապետություն։

Ընտրություններին մասնակցում են 5 կուսակցություններ եւ 4 դաշինքներ։ Խորհրդարան անցնելու համար կուսակցություններին անհրաժեշտ է ստանալ ընտրողների քվեների 5 տոկոսը, դաշինքներին՝ 7 տոկոսը։