Ոչ մի ողբերգություն ու աղետ չկա․ ՌԴ դեսպանը՝ Հայաստանի կողմից ռուսական վարկը մերժելու մասին

Կոռեկտ չեմ համարում Ռուսաստանի կողմից Հայաստանին տրվող վարկից հրաժարվելու մասին լրատվամիջոցների հրապարակումները։ Այս մասին այսօր առցանց ասուլիսի ժամանակ ասաց Հայաստանում ՌԴ արտակարգ և լիազոր դեսպան Սերգեյ Կոպիրկին, անդրադառնալով փաստին, որ ՀՀ-ն հարժարվում է ռուսական վարկի մի մասից։ 

«Վարկը 270 մլն դոլար է, որի մեծ մասը՝ 200 մլն դոլարն արդեն ծախսված է, խոսքը մնացածի մասին է։ Ցավոք, աշխատանքներն ավարտին չհասան մինչև ժամկետի ավարտը։ Պատճառները տարբեր են, և դրա մասին չեմ խոսի։ Վարկի մարման երկարաձգման հարց է առաջացել, սակայն այս թեմայով կան ու այս պահին էլ ընթանում են բանակցություններ»,- ասաց դեսպանը։

Նա ասաց, որ որքանով իրեն է հայտնի է, դեռևս չի ստացվել պայմանավորվածություն ձեռք բերել, սակայն դա չի նշանակում, որ հարցը փակ է։

«Պարզապես այս պահին Հայաստանը հաշվի առնելով ժամանակը, որոշել է անհրաժեշտ աշխատանքներն իրականացնել սեփական միջոցներով՝ ժամանակ չկորցնելու համար։ Նշեմ, որ ՀԱԷԿ շահագործման երկարաձգման համար լիցենզիան գործում է մինչև 2021թ. և որպեսզի այն վերագործարկվի, պետք է շատ լուրջ աշխատանքներ կատարվեն»,-ասաց դեսպանը, հաղորդում է Tert.am-ը:

Նրա կարծիքով՝ ժամանակ չկորցնելու համար ՀՀ-ն որոշել է վարկի հարցը հետաձգել և իրականացնել այդ աշխատանքները սեփական միջոցներով։ Դեսպանը նշեց, որ ռուսական կողմից, այդ մասով հարցեր չեն առաջացել և ոչ մի ողբերգություն ու աղետ չկա։

Աղբյուր՝ Tert.am