Թբիլիսին զգուշավոր է «Իգլա»-ի մասին մեկնաբանություններում, վրաց ընդդիմադիրները պարզաբանում են պահանջում

Վրաստանի պատկան մարմիններում պաշտոնյաները միայն տարակուսած ուսերն են թոթվում, ասելով, թե չգիտեն՝ որտեղից է ի հայտ եկել այդ զենքը և ինչպես է հայտնվել Հայաստանում, բայց՝ խոստանում են պարզել: Այս մասին տեղեկացնում է «Ազատությունը»։

Վրաստանի իշխանություններն առայժմ ոչ հաստատում, ոչ էլ հերքում են պաշտոնական Երևանի պնդումները, թե երկրի տարածքով փորձ է արվել «Իգլա» տեսակի զենիթա-հրթիռային համալիր ու հրթիռ տեղափոխել Հայաստան: Ինչպես Թբիլիսիից փոխանցում է «Ազատություն» ռադիոկայանի վրացական ծառայության թղթակիցը, տեղական իշխանությունները նախընտրում են չխոսել այս թեմայով, խոսելիս էլ՝ խիստ զգուշավոր են արտահայտվում:

«Դեռևս չի կարելի պնդել, որ «Իգլա» տեսակի զենիթա-հրթիռային համալիրը Վրաստանից Հայաստան է տեղափոխվել: Հետաքննություն է ընթանում, ստուգվում են բոլոր մանրամասները: Մենք շփման մեջ ենք մեր հայ գործընկերների հետ և հանրությանը կտեղեկացնենք քննության արդյունքների մասին»,- հայտարարել է ներքին գործերի նախարար Գեորգի Մգեբրիշվիլին:

Պատկան մարմիններում, ըստ վացական ծառայության թղթակցի, պաշտոնյաները միայն տարակուսած ուսերն են թոթվում, ասելով, թե չգիտեն՝ որտեղից է ի հայտ եկել այդ զենքը և ինչպես է հայտնվել Հայաստանում, բայց՝ խոստանում են պարզել: «Կոչ եմ անում այս հարցն անհարկի չշահարկել և սպասել քննության ավարտին»,- երեկ հայտարարել է խորհրդարանի Պաշտպանության ու անվտանգության հարցերով հանձնաժողովի նախագահ Իրակլի Սեսիաշվիլին:

«Այդպիսի դեպք չի եղել տևական ժամանակ: Մեր անվտանգության ծառայությունները շփման մեջ են հայաստանցի գործընկերների հետ: Քննություն է ընթանում, այդ իսկ պատճառով անլուրջ կլինի մեր կողմից ցանկացած մեկնաբանություն, մինչև քննության ավարտը: Մենք ունենք տեխնիկական հնարավորություններ անհրաժեշտության դեպքոմ որոշելու՝ արդյո՞ք նման դեպք տեղի է ունեցել»,- ասել է նա:

Մանրամասները՝ «Ազատությունում»