Դպրոցական քննություններ չեն լինի, բուհ ընդունվելու համար մեկ քննություն պետք է հանձնեն դիմորդները

Այս ուսումնական տարին կամփոփվի հեռավար, դպրոցական քննություններ չեն լինի, իսկ բուհ ընդունվելու համար ընդամենը մեկ քննություն պետք է հանձնեն դիմորդները: Այս մասին ֆեյսբուքի ուղիղ եթերով տեղեկացրեց ԿԳՄՍ նախարար Արայիկ Հարությունյանը:

«Տարին հեռավար ենք ավարտելու, այսինքն՝ առկա լսարանային դասեր չեն լինելու: Եվ մայիսին նույնպես հեռավար կրթությունը շարունակվելու է: Մենք այս ընթացքում հաշվառում ենք, թե ինչ ծավալ է փակվել և նախատեսում ենք, որ հաջորդ ուսումանական տարում՝ սեպտեմբեր ու հոկտեմբեր ամիսներին շաբաթ օրերին կունենանք պահուստային օրեր: Նաև քննարկում ենք ուսումնական տարին մեկ շաբաթով շուտ սկսելը»,- ասաց Արայիկ Հարությունյանը:

Դպրոցներում փոխադրական քննությունների վերաբերյալ նախարարն ասաց, որ հանրակրթական ուսումնական հաստատություններում կրթական մի աստիճանից մյուսը տեղափոխվելու քննություններ չեն անցկացվելու 4-րդ և 9-րդ դասարանի ավարտին: Աշակերտների՝ մինչև մարտի 13-ն ունեցած և էլեկտրոնային մատյան փոխանցված գնահատականների հիման վրա ամփոփվելու են նրանց տարեկան գնահատականները, որոնք համարվում են քննական: Փոխադրական քննություններ չեն անցկացվելու նաև ավագ դպրոցի 10-րդ և 11-րդ դասարններում, ամփոփոխումը տեղի է ունենալու նույն ձևով:

«Այսինքն՝ այս տարվա քառորդները մենք հետևյալ կերպ ենք ամփոփելու՝ մինչև մարտի 13-ն ընկած ժամանակահատվածի գնահատականներով: Դպրոցներում ավարտական՝ 12-րդ դասարանի քննություններ չեն իրականացվելու, ամփոփումը տեղի է ունենում նույն ձևով, ինչպես 4-րդ և 9-րդ դասարանների դեպքում: Քոլեջների և ուսումնարանների ավարտական քննություններ և դիպլոմային աշխատանքների պաշտպանություններ չեն իրականացվելու, ամփոփումը կատարվում է ինչպես դպրոցական ավարտականների դեպքում՝ եթե սովորողը գնահատական չունի երկրորդ կիսամյակում, տարեկանը նշանակվում է առաջին կիսամյակի արդյունքում»,- ասաց նա:

Նախարարը հավելեց, որ մի շարք որոշումներ կայացվել են այն տրամաբանության մեջ, որ զորակոչի գործընթացը չխոչընդոտվի: Բուհերում ավարտական քննությունների ձևն ընտրում են առանձին բուհերը՝ իրենց ինքնավարության սահմաններում՝ պահպանելով համավարակի կանոնները:

Մեդալի քննություններ ևս չեն իրականացվելու, հավակնորդներին հնարավորություն կտրվի մասնակցել հաջորդ ուսումնական տարում:

Անդրադառնալով բուհերի ընդունելության քննություններին՝ նախարարը նշեց, որ մայիսի 25-ից հնարավորություն կտրվի հայտագրվել մինչև հունիսի 15-ը: Դիմորդները միաժամանակ կընտրեն թե քննական առարկան, թե բուհն ու մասնագիտությունը: Մինչև մարտի 15-ը մի քանի մասնագիտությունների համար հայտագրված դիմորդներին կվերադարձվեն քննությունների համար վճարված գումարները՝ փոխանցման միջոցով:

«Այսինքն՝ դուք հասկացաք, չէ՞, մենք մեկ քննություն ենք հանձնելու: Բուհերի հետ դեռ քննարկում ենք և մինչև ամսի 30-ը կասենք, թե որ մասնագիտությունից որն է լինելու այդ միակ քննության առարկան: Մենք սա արեցինք, որովհետև ցանկացանք, որ ոչ միայն ատեստատներով լինի ընդունելություն, այլ նաև գիտելիքը ստուգենք: Քննական կենտրոնները լինելու են ամբողջ հանրապետությունով մեկ, սահմանափակ դիմորդներ կլինեն մեկ տարածքում՝ դիմակներով, ախտահանման միջոցներով»,- մանրամասնեց նա:

Արայիկ Հարությունյանը նաև նշեց, որ ինչ վերաբերում է Վերջին զանգի արարողությանը, միայն համավարկի ավարտից հետո կորոշեն մեկ օր, և այն կանցկացվի: