Կանխատեսվում է, որ մեր ՀՆԱ-ն կունենա բացասական մեծություն 2 տոկոս չափով, պետական պարտք-ՀՆԱ ցուցանիշը կաճի և կմոտենա 60 տոկոս մակարդակին. ֆինանսների նախարար

Առաջարկվում է 2020 թվականի բյուջեի գործող օրենքում փոփոխություններ իրականացնել: Այս մասին այսօր կառավարության նիստին ասաց ֆինանսների նախարար Ատոմ Ջանջուղազյանը: Հաղորդում է Tert.am-ը:

«2020 թվականի բյուջեի մասին օրենքն ընդունելիս գործնականում հնարավոր չէր կանխատեսել այն, ինչ տեղի ունեցավ, և չեք գտնի որևէ պետություն, որ համաճարակի հետ կապված զարգացումներին արձագանքած չլինի: Ակնհայտ է, որ Հայաստանը, լինելով բաց տնտեսություն ունեցող պետություն, չի կարող անհաղորդ մնալ արտաքին աշխարհում տեղի ունեցող զարգացումներին։ Ըստ էության արտաքին ցնցումներն իրենց դրսևորումը գտնում են երկրների տնտեսական աճի վրա՝ բացասական ազդեցությամբ։ Դա ՀՀ-ի համար առաջացնում է խնդիրներ»,-ասաց նա և նշեց, որ մյուս կողմից ապրանքային շուկայում տեղի ունեցող զարգացումները չեն կարող չազդել հանքահումքային արդյունաբերության վրա:

«Այդ զարգցումները մեր տնտեսության համար արտահայտվում են արտաքին պահանջարկի թուլացմամբ, զբոսաշրջության ոլորտի գործունեությունը, ակնհայտ է, որ դադարել է և կանխատեսումները ոլորտի վերականգնման լավատեսական չեն, մասնավոր տրասնվերտների վրա ևս անդրադարձ կլինի»,-ասաց նա և նշեց, որ որպես դրանց հետևանք՝ առկա է արտահանման կրճատման սպասումներ, դրամական փոխանցումների ներհոսքի նվազում և ծառայությունների հնարավոր կրճատումը:

«Մեր մեկուսացումը, հիվանդությունների դեպքերը, արտակարգ դրության հետևանքով սահմանափակումները չէին կարող իրենց ազդեցությունը չթողնել, բացի այդ՝ անորոշության որոշակի աստիճան կա, որը կարող է իր ազդեցությունն ունենալ կրճատվող ներդրումների տեսքով, գործազրկության հնարավոր ավելացմամբ և ցածր եկամուտների տեսքով: Այս բոլորը չեն կարող իրենց ազդեցությունը չունենալ մեր տնտեսության վրա՝ գործնականում բոլոր ճյուղերում: Ներկայացված է, որ վիրուսի դեմ պայքարի շրջանակներում սահմանափակումների արդյունքում կարող է 2-2․4 տոկոս բացասական ազդեցություն ունենալ ՀՆԱ-ի իրական աճի տեսանկյունից»,-ասաց նա:

Նախարարը նշեց, որ արտաքին և ներքին սահմանափակումները հաշվի առնելով՝ կանխատեսվում է, որ մեր ՀՆԱ-ն կունենա բացասական մեծություն 2 տոկոս չափով, ինչը տարբերվում է տնտեսական աճի ցուցանիշից, որը 4․9 տոկոս էր նախատեսված:

«Դրա արձագանքման քաղաքականություն պետք է իրականացվի և շատ կարևոր է, որ մենք ունենք մինչ այժմ կուտակած պոտենցյալ, որը կարող է այս իրավիճակի համար օգտագործվել: Խոսքը նրա մասին է, որ նախկին հարկաբյուջետային քաղաքականության արդյունքում ունեցել ենք հնարավորություն ապահովել թե՛ հարկաբյուջետային կայունությունը, թե՛ պետական պարտքի կայունությունը: Այլ կերպ ասած՝ դա այն պոտենցյալն է, որը պետք է օգտագործվի և հենց այդ ճանապարհով հակազդման միջոցառումները նախատեսվել են»,-ասաց նա:

Ատոմ Ջանջուղազյանը նշեց, որ տնտեսական աճի բացասական սպասումը չի կարող չհագեցնել հարկային եկամուտների՝ նախատեսվածից համեստ ցուցանիշի: Խոսելով պետական պարտքից՝ Ատոմ Ջանջուղազյանն ասաց. «Մոտավորապես 260 միլիարդ դրամ է լրացուցիչ ֆինանսական միջոցների ներգրավման գնահատականը, սա նշանակում է, որ նաև ՀՆԱ-ի սպասվող մեծությունը, մեր պետական պարտք-ՀՆԱ ցուցանիշը կաճի և կմոտենա 60 տոկոս մակարդակին, մինչդեռ մենք 2019 թվականին մենք ունեինք 50 տոկոս»:

Մանրամասները՝ Tert.am-ում: