Հայաստանին ԱՄՀ-ի տրամադրած 280 մլն դոլարը կուղղվի COVID-19-ի հետևանքների մեղմացմանը

ՀՀ կառավարությունը Արժույթի միջազգային հիմնադրամի տրամադրած 280 մլն դոլարը կուղղի նոր տիպի կորոնավիրուսի հետևանքների մեղմացմանը։

«Արմենպրես»-ի հաղորդմամբ՝ այս մասին մամուլի ասուլիսին ասաց ՀՀ էկոնոմիկայի նախարարի տեղակալ Ավագ Ավանեսյանը։

«Արժույթի միջազգային հիմնադրամը ՀՀ-ին տրամադրում է աջակցություն, որի ծավալը կազմում է 206 մլն հատուկ փոխառության իրավունք, որը դոլարային արտահայտությամբ կազմում է 280 մլն ԱՄՆ դոլար։ Այս միջոցները հասանելի են մեր կառավարությանը, քանի որ մենք շարունակաբար բարելավել ենք գործարար միջավայրը և ապահովել ենք ներդրումների պաշտպանությունը, ինչպես նաև բարեփոխումներ են իրականացրել։ Արդյունքում, միջազգային հանրության մոտ վստահություն է ձևավորվել, որ Հայաստանի Հանրապետությունն այս միջոցներն ուղղելու է կորոնավիրուսի հետևանքների մեղմացմանը»,- նշեց Ավանեսյանը։

Նա վստահեցրեց, որ այդ միջոցների ծախսելու հիմնական նպատակը լինելու է առողջապահական համակարգի զգալի հզորացումը, ինչպես նաև սոցիալական և տնտեսական շոկերի մեղմացումը։

«Սա առանց պայմանների վարկ է, այսինքն՝ Կառավարությունն է ընտրելու, թե ինչի վրա է ծախսվելու այդ գումարը։ Այս գումարի՝ ՀՀ կառավարությանը հասանելիությունը զգալիորեն հզորացնում է հակահամաճարակային միջոցառումների իրականացման կարողությունը»,- ասաց Էկոնոմիկայի փոխնախարարը։