Ո՞վ կսպասեր, որ հեռավոր 1988 թ․ գրաքննությունը կկրկնվի 2020-ին

«Հրապարակ» թերթը գրում է. «Երբ հեռավոր 1988 թվականին առաջին անգամ խմբագիր նշանակվեցի, երկիրը նորից խառնաշփոթի մեջ էր՝ սովետական դարաշրջանն արագ տեմպերով հեռանում էր, սակայն նոր երկիրը դեռ չկար, և հին համակարգերը դիմադրում էին։ Ճիշտ է՝ թերթն ընդամենը գործարանային էր, բայց 2 հազար տպաքանակ ուներ, որն անվճար բաշխվում էր հսկա գործարանի աշխատակիցներին և բավականին ազդեցիկ էր։

Հիշողությանս մեջ դաջվել է Գդլյան-Իվանով գործի մասին հոդվածը, որտեղ նկարագրել էինք, թե ինչ բացահայտումներ են արել Միջին Ասիայում այս երկու քննիչները՝ ինչ յուրացումների շղթա են հայտնաբերել։

Հիշում եմ իմ՝ երիտասարդ խմբագրիս համառ վեճը, որի արդյունքում նյութը՝ փոքրիկ շտկումներից հետո, մնաց։

Ո՞վ կսպասեր, որ տասնամյակներ անց՝ 2020 թվականին, ես գրեթե նույն իրավիճակում կհայտնվեմ՝ որպես խմբագիր, և ստիպված կլինեմ պայքարել ազատ խոսքի մեր իրավունքի իրացման համար։ Եվ ո՞վ կսպասեր, որ գրաքննության ջատագովը կդառնա իմ նախկին գործընկերը, որը նույնպես տասնամյակներ շարունակ պայքարել է ազատ խոսքի իրավունքի համար և ժամանակին ոչ քիչ ջանքեր է դրել իր հիմնադրած թերթում ազատորեն գրելու և լիարժեք արտահայտվելու համար։ Պատմությունը կրկնվո՞ւմ է»:

Մանրամասները՝ թերթի այսօրվա համարում: