Հայ ժողովուրդին առաջարկվում է հաստատել նոր ստալինյան ռեժիմ` 37 թվի մոդելով և դրա համար էլ վճարել 5 մլն դոլար. Տեսանյութ

Նիկոլ Փաշինյանի կողմից առաջարկված Սահմանադրական հանրաքվեն տարբեր կողմերով կարելի է դիտարկել: Մի կողմ թողնենք, որ այն անօրինական բնույթ ունի: Ցավոք հայ ժողովուրդին դրանով զարմացնել հնարավոր չէ: Նախկինում էլ պակաս հակաօրինական քայլեր չեն եղել: Սակայն այստեղ կա մի գործոն, որն նախկինում երբեք չի եղել: Նախկինները իրենց ավտորիտար հակումները փորձում էին թաքցնել, փաթեփավորել ինչ- ինչ քաղաքական ձևակերպումներով: Ավելին՝ նախկինների ավտորիտար հակումները օբյեկտիվ  սահմանափակումներ ունեին նրանք բարձր հեղինակություն չունեին հանրության մեջ և բնականաբար, չէին փորձում հենվել հանրության լայն շերտերի վրա: Նրանք ավելի շատ փորձում էին «պայմանավորվել» հանրության շերտերի շահերը ներկայացնողների հետ, որն էլ իրենց ավտորիտարիզմը դարձնում էր «պայմանագրային» բնույթի:

Փաշինյանի մոտ լրիվ այլ մոտեցում է: Նա ցանկանում է՝  հենվելով հանրության ամենաընչազուրկ հատվածի վրա, երկրում ձևավորել բացարձակ մենիշխանություն ոչ մեկի հետ չպայմանավորվելով, ակնհայտ տոտալիտար բնույթի համակարգի հաստատման հեռանկարով: Ինքը` Փաշինյանը,  ուզում է տարբերվել իր նախորդից նրանով, որ  ցանկանում է երկրում հաստատել  ոչ թե, այսպես կոչված,  «պայմանագրային»  ավտորիտարիզմ, այլ  բացարձակ ավտորիտար համակարգ, որն հենված կլինի հանրության ամենահետամնաց շերտերի վրա: Այդպիսի համակարգը ինքնին պահանջելու է ունենալ «առաջնորդ ֆյուրերի» ինստիտուտ և Փաշինյանը հավակնում է լինել հենց այդպիսի առաջնորդ:

Եթե նրան դա հաջողվի, ապա երկրում անխուսափելիորեն հաստատվելու է ստալինյան տիպի բռնատիրական ռեժիմ, դրանից բխող հետևանքներով: Այդ դեպքում մենք կվերհիշենք, թե 37 թվականին ինչպես էին մեր պապերին «ժողովուրդի անունից» գնդակահարում կամ աքսորում Սիբիր:

Բայց այս ամենի մեջ կա նաև մեկ այլ կարևոր հանգամանք: Եթե մենք հանդուրժենք, որ 21 դարում մեր երկրում հաստատվի այդպիսի ռեժիմ, ապա մենք այլևս բարոյական իրավունք չենք ունենա մյուսներին մեղադրելու ցեղասպանություն և  ջարդեր իրականացնելու համար: Այսօր 21 դարում այլևս աշխարհի ոչ մի ֆաշիստական ռեժիմ չի կարող ուրիշին մեղադրել նույնանման արարքների համար: Նույնիսկ ԽՍՀՄ-ի դերն են փորձում վերանայել 2-րդ համաշխարային պատերազմում միայն այն բանի պատճառով, որ ստալինյան ռեժիմը իր բնույթով քիչ էր տարբերվում հիտլերյանից:

Ամենահետաքրքիրն այն, որ Փաշինյանը առաջարկում է ժողովուրդին, հաստատել իր մենիշխանությունը՝  վճարելով մոտ 5 մլն դոլար: Երբեք ժողովուրդին այս աստիճանի նվաստացուցիչ առաջարկ չեն  արել: Եվ այդ իմաստով սա յուրօրինակ էքսպերիմենտ է թե ժողովուրդի, և թե երկրի վերնախավի համար: Ինչպես կավարտվի այս «էսպերիմենտը» ուշադրության հետևելու են նաև դրսում, դրանից եզրակացնելով նաև մեր ժողովուրդի մասին:

Սա է իրականությունը:

Արտակ Հակոբյան