Արցախի հարցը տապալելու է․ Շանթ Հարությունյան. Տեսանյութ

Այն մարդիկ, ովքեր ինձ փորձում են վախկոտ ներկայացնել, լոգիկայի դեգրադացիա ունեն։ Այս մասին Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է «Ցեղակրոն» կուսակցության նախագահ Շանթ Հարությունյանը։

Նա նշել է, որ այդ մարդիկ, իրենց պահվածքով ցույց են տալիս, որ ընդդիմադիրների նկատմամբ հալածանքներ կան․ «Այդ մարդիկ ամոթի զգացում չունեն, որովհետև իրենք ուրախ են, որ ընդդիմադիրներն իրենց հայացքների համար հալածվում են»։

Խոսելով վերջին մեկ տարում հրապարակայնորեն չխոսելուց՝ Շանթ Հարությունյանն ասել է, որ դա բարոյական զգացումից էր, որ ինքը չէր խոսում․ «Սերժ Սարգսյանն ինձ կալանավորել էր, որ ես վեց տարի չխոսեմ։ Ու, երբ ինձ վաղաժամ ազատ արձակեցին, որի հետ ես համաձայն չէի, ելնելով ներքին բարոյականությունից՝ ես մեկ տարի չեմ խոսել»։

Անդրադառնալով որդուն՝ Շահեն Հարությունյանին աշխատանքից ազատ արձակելու հարցից, Շանթ Հարությունյանն ասել է, որ դա նախապես պլանավորած է եղել. «Ես որոշել էի խոսել նոյեմբերի 5-ին։ Այդ օրը լրանում էր իմ ազատազրկման վեց տարին ու երբ լրագրողներն ինձ զանգահարում ու ասում էին, որպեսզի հարցերի պատասխանեմ, ես ասում էի, որ կխոսեմ նոյեմբերի 5-ին ու իմ հեռախոսազանգերը ԱԱԾ-ն գաղտնալսում էր։ Շահենին աշխատանքից ազատեցին նոյեմբերի 1-ին, որպեսզի, երբ ես նոյեմբերի 5-ին խոսեմ, ասեն՝ որդուն ազատել են, դրա համար է խոսում»։

Անդրադառնալով 2018-ի ապրիլյան իրադարձություններին ու դրանից հետո նոր իշխանության քայլերին՝ Շանթ Հարությունյանն ասել է, որ միայն գործելաոճով կարելի է ցույց տալ՝ տեղի ունեցածը հեղափոխությո՞ւն էր, թե ոչ, սակայն երևում է, որ ոչ մի նոր բան չի արել Նիկոլ Փաշինյանը։

Շանթ Հարությունյանը համոզված է, որ Նիկոլ Փաշինյանը կոռուպցիոն որևէ գործարքի մեջ ներքաշված չէ, պարզապես Հայաստանում, ինչպես նախկինում, այդպես էլ հիմա գործում է ռուսական «Կա-Գե-Բե»-ն. «Նիկոլ Փաշինյանը ռուսների գործն է անում։ Եթե վաղն Արցախի շուրջ պատերազմ հրահրվի, ընդդիմադիրներն ասելու են՝ Նիկոլն էր մեղավոր, «նիկոլականներն էլ» ասելու են՝ ընդդիմադիրներն են մեղավոր, և այս ամենը ռուսների ուզածն է»։

Ամփոփելով խոսքը՝ Շանթ Հարությունյանը մաղթել է բոլորին խաղաղություն․ «Այն ժողովուրդը, որը չի հասկանում՝ պետությունն ինչ է, կորցնելու է այն։ Մարդկանց միջից պետք է չարությունը դուրս գա, հայ ժողովուրդը պետք է ունենա սիրո և ամոթի զգացում»։

Մանրամասները՝ կից տեսանյութում: