Չարենցավանի քաղաքային գրադարանին նվիրվել է ՀՀ բույսերի և կենդանիների կարմիր գիրք

2017թ-ի մարտի 3-ին ՀՀ Կոտայքի մարզի Չարենցավան քաղաքի N 2 հիմնական դպրոցում անցկացվել է բնապահպանական բաց դաս: Դպրոցի տնօրինության հրավերով դասը վարել է ՀՀ բնապահպանության նախարարության աշխատակազմի քարտուղարության պետ Ն. Ալավերդյանը:

Բաց դասին մասնակցել են 7-րդ դասարանների աշակերտներ, քիմիայի, աշխարհագրության, կենսաբանության, բնագիտության ուսուցիչներ:

Բաց դասի ընթացքում ներկայացվել են մեր հայրենի բնության հատուկ պահպանվող տարածքները, դրանց պահպանության ռեժիմի առանձնհատկությունը։ Երեխները տեղեկացվել են ամենահին՝ «Խոսրովի անտառ» պետական արգելոց» և վերջին տարիներին ձևավորված «Արփի լիճ» ազգային պարկ» հատուկ պահպանվող տարածքների մասին։ Ներկայացվել է Հայաստանի մայրաքաղաքի սրտում գտնվող «Էրեբունի արգելոց»-ը։ Բանախոսն ընդգծել է, որ մայրաքաղաքում արգելոցի կարգավիճակ ունեցող հատուկ պահպանվող տարածքի առկայությունը հազվագյուտ երևույթ է։

Ն. Ալավերդյանն աշակերտներին մանրամասն ներկայացրել է Հայաստանի Հանրապետության ֆլորայի և ֆաունայի էնդեմիկ տեսակները, ջրային ռեսուրսները, դրանց արդյունավետ կառավարման և օգտագործման խնդիրները, թե ինչ է օզոնը և օզոնային շերտը:

Հանդիպման ավարտին երեխաներին բաժանվել են Օզոնային շերտի պահպանության վերաբերյալ նոթատետրեր, դպրոցի գրադարանին նվիրվել են Հայաստանի ԲՀՊՏ-ների մասին պատմող բուկլետներ։

Հայաստանի Հանրապետության բնապահպանության նախարարի անունից Չարենցավանի քաղաքային գրադարանին նվիրվել է Հայաստանի Հանրապետության բույսերի և կենդանիների կարմիր գիրք, որպեսզի քաղաքի դպրոցների աշակերտները հնարավորություն ունենան օգտվել այդ սահմանափակ քանակությամբ հրապարակված արժեքավոր գրքից։