Տեսահոլովակը դեռևս չի նշանակում, որ մենք կիսում ենք նրանց գաղափարախոսությունը․ «Ռեինկարնացիա»

Երեկ ողջ համացանցը քննարկում էր «Ռենկարնացիա» խմբի «Փոխենք աշխարհը» երգի տեսահոլովակը, որը նախատեսված է ՀՀԿ-ի քարոզչության համար։ Հարվածային գործիքները տեսահոլովակում նվագում էր վարչապետ Կարեն Կարապետյանը։

Hraparak.am-ը գրում է, Երբ ֆեյսբուքում սկսեցին մեղադրել խմբին ՀՀԿ-ի համար աշխատելու մեջ, նրանք իրենց էջում «դատարկագլուխներին» կոչ արեցին քարոզչական հոլովակը չքաղաքականացնել։ Հետո գրառումը ջնջվեց էջից, շատերի թողած մեկնաբանությունները ջնջվեցին, ինչն էլ ավելի մեծացրեց դժգոհության ալիքը։

«Ռենկարնացիա» խմբից «Հրապարակին» հայտնեցին, որ իրենք չեն կիսում որևէ քաղաքական ուժի գաղափարախոսությունը․ «Մեզ համար հետաքրքիր էր վարչապետին տեսնել քաղաքականությունից դուրս և տեսահոլովակը դեռևս չի նշանակում, որ մենք կիսում ենք նրանց գաղափարախոսությունը»։ Այլ հարցերի չցանկացան պատասխանել՝ ստեղծված իրավիճակն ավելի չսրելու համար։

Ինչպես հայտնի է, մարտի 8-ին տեղի կունենա խմբի համերգը, խմբի անդամները նշում են, որ դա դեռևս վաղուց էր որոշվել և ՀՀԿ-ն այդ համերգը կազմակերպելու համար իրենց չի աջակցել։ Նրանք չբացառեցին, որ հնարավոր է հանդիսատեսից շատերը չցանկանան մասնակցել համերգին։ Ֆեյսբուքում արդեն իսկ ֆլեշմոբ է սկսվել․ քաղաքացիները որոշել են վերադարձնել գնված տոմսերն ու բոյկոտել համերգը։

Մենք նաև տեղեկություն ունեինք, որ խումբն այլ կուսակցությունների համար ևս պատրաստվում է երգել, անգամ ընդդիմադիր դաշտից, այս տեղեկությունը խմբի անդամները չցանկացան մեկնաբանել՝ նշելով, որ բաց են բոլոր տեսակի համագործակցությունների համար և տարատեսակ առաջարկություններ են ստացել, որոնց մասին կիմանանք առաջիկայում։