«Հաց բերող» Արթուր Սարգսյանն ունի սթափ գիտակցություն, հստակ խոսք և հրաժարվել է հոսպիտալացվել. ՔԿՎ պարզաբանումը

ՀՀ ԱՆ «Դատապարտյալների հիվանդանոց» քրեակատարողական հիմնարկի կալանավորված անձ Արթուր Սարգսյանի առողջական վիճակի վերաբերյալ Քրեակատարողական ծառայությունը ներկայացրել է պարզաբանում։

ՀՀ ԱՆ ՔԿՎ հանրային կապերի բաժնից հայտնում են, որ Արթուր Սարգսյանը, փետրվարի 10-ից գտնվելով հացադուլի մեջ, հրաժարվում է նաև առհասարակ որևէ տեսակի բժշկական օգնություն ստանալուց։ Հիմնարկի թե վարչակազմի և թե համապատասխան մասնագետների, ինչպես նաև իր փաստաբանների հորդորները հացադուլը դադարեցնելու և պատշաճ բուժօգնություն ստանալու վերաբերյալ մշտապես մնացել են անպատասխան։

«Սպառելով Սարգսյանին բուժօգնություն տրամադրելու հնարավորություն ունենալու բոլոր եղանակները՝ փետրվարի 1-ին՝ ժամը 19:00-ի սահմաններում, քրեակատարողական հիմնարկի վարչակազմի կողմից հրավիրվել է շտապ բուժօգնության խումբ՝ վերջինիս քաղաքացիական հիվանդանոց տեղափոխելու և նրա առողջական վիճակի մասին հավելյալ տեղեկատվություն ունենալու, ապա անհրաժեշտության և հնարավորության դեպքում նաև պատշաճ բժշկական օգնություն տրամադրելու նկատառումով։

Սարգսյանը սակայն հիմնարկի վարչակազմի, համապատասխան մասնագետների, իր փաստաբանների և շտապօգնության աշխատակիցների ներկայությամբ հրաժարվել է ինչպես քաղաքացիական հիվանդանոց տեղափոխվելուց, այնպես էլ վերջիններիս կողմից իրականացվող որևէ բժշկական գործողությունից, ինչի վերաբերյալ կան համապատասխան արձանագրություններ։

Այս պահի դրությամբ Արթուր Սարգսյանն ունի սթափ գիտակցություն և հստակ խոսք»,–ասվում է հաղորդագրությունում։

Հիշեցնենք, որ «Հաց բերող» անունով հայտնի Արթուր Սարգսյանը ձերբակալվել էր 2016թ. հուլիսի իրադարձություններից հետո. նա ՊՊԾ գունդը գրաված «Սասնա ծռեր» խմբի անդամներին սնունդ էր հասցրել։