Այսօր «մարտիմեկյան» իրադարձությունների 9-րդ տարելիցն է(ՏԵՍԱՆՅՈՒԹ)

Այսօր մարտիմեկյան դեպքերի 9-րդ տարելիցն է: 2008 թ. փետրվարի 19 ընտրությունների արդյունքներից դժգոհ քաղաքացիները՝ ՀՀ առաջին նախագահ Լևոն Տեր-Պետրոսյանի գլխավորությամբ հանրահավաքներ ու նստացույց էին անցկացնում Ազատության հրապարակում: Փետրվարի վերջին օրերին արդեն Ազատության հրապարակում տեղադրված էին վրաններ՝ Հայաստանի աշխարհագրական տեղանքների անուններով:

Մարտի 1-ի վաղ առավոտյան ոստիկանության աշխատակիցները Ազատության հրապարակում զենք, զինամթերք և մոլոտովյան կոկտեյլներ հայտնաբերելու պատրվակով ներխուժեցին հրապարակ, հարձակվեցին խաղաղ ցուցարարների վրա և ուժով ցրեցին նրանց: 

Ազատության հրապարակից ցրված ժողովուրդը ժամեր անց հավաքվեցին Մյասնիկյանի արձանին հարող հրապարակում՝ Ֆրանսիայի և Ռուսաստանի դեսպանատների առաջ, և սկսվեց ինքնաբուխ հանրահավաք։

Օրվա երկրորդ կեսին արդեն սադրանքները սկսվել էին, ոստիկանությունն ու զորքերը կանգնած էին մի կողմում, ցուցարարները մյուս: Այս իրադարձությանը հաջորդեց Ռոբերտ Քոչարյանի հրամանագիրը՝ երկրում արտակարգ դրություն մտցնելու մասին:

Այդ օրը գիշերն էլ տեղի ունեցավ բախում ցուցարարների և ոստիկանական, զինվորական ուժերի միջև, այրվեցին, շրջվեցին ավտոմեքենաներ, ավտոբուսներ, տուժեցին հարակից շինություններն ու վերջինիս բնակիչները: Իսկ մարտի երկուսի առավոտյան հայտնի դարձավ, որ նախորդ օրը զոհվել են մարդիկ, որոնց ստույգ թիվը հայտնի չէր: 

Օրեր անց պարզվեց, որ այդ օրը զոհվեցին 10 մարդ, որից երկուսը զինվորական, իսկ ավելի քան 200-ը տարբեր աստիճանի վնասվածքներ ստացան: Բանտերում հայտնվեցին շարժման հարյուրից ավելի ակտիվիստներ:

Զոհվածներն էին՝ Տիգրան Խաչատրյանը, Գոռ Քլոյանը, Գրիգոր Գևորգյանը, Դավիթ Պետրոսյանը, Արմեն Ֆարմանյանը, Զաքար Հովհաննիսյանը, Սամվել Հարությունյանը, Համլետ Թադեւոսյանը, Հովհաննես Հովհաննիսյանը և Տիգրան Աբգարյանը:

Zham.am

Լուսանկարը՝ Photolure-ի: