Տաքսու վարորդի վիզը կտրելու մեջ կասկածվող Վարդանի մեքենայից 5 ամիս առաջ թմրամիջոց էր հայտնաբերվել

Արածագոտնի մարզում փետրվարի 26-ին տաքսու վարորդ Կարլեն Գրիգորյանի վիզը կտրելու մեջ կասկածվող Վարդան Հովսեփյանն ընդամենը 1 ամիս առաջ պայմանական ազատազրկման էր դատապարտվել:

NEWS.am-ը Դատական տեղեկատվական համակարգից տեղեկացավ, որ ըստ մեղադրական եզրակացության, 25-ամյա Վարդանը 2016թ. սեպտեմբերի 13-ին ապօրինի ձեռք է բերել և իր մեքենայի սրահում պահել զգալի չափերով «մարիխուանա» թմրամիջոց, որը հայտնաբերվել և վերցվել ոստիկանության աշխատակիցների կողմից:

Շիրակի մարզի ընդհանուր իրավասության դատարանը Վարդան Հովսեփյանին հունվարի 20-ին մեղավոր է ճանաչել եւ դատապարտել 8 ամսվա ազատազրկման, սակայն պատիժը պայմանականորեն չի կիրառել` սահմանելով 1 տարվա փորձաշրջան: Մեղադրող կողմը վերաքննիչ բողոք էր ներկայացրել:

Ավելի վաղ ոստիկանությունը հաղորդել էր, որ 2017թ. փետրվարի 26-ին ժամը 17.45-ին ոստիկանության Թալինի ահազանգ էր ստացվել, որ Թլիկ գյուղի հարակից դաշտում հայտնաբերվել է դիակ՝ պարանոցի շրջանում արնահոսող վնասվածքով:

Ձեռնարկված միջոցառումներով պարզվել է դիակի ինքնությունը՝ 20-ամյա Կարլեն Գրիգորյան: Պարզվել է նաեւ, որ նույն օրը, ժամը 16:00-ի սահմաններում, 25-ամյա Վարդան Հ.-ն Երեւանի Լենինգրադյան փողոցից նստել է Կարլեն Գրիգորյանի «Մերսեդես C180» մակնիշի տաքսի ավտոմեքենան՝ Գյումրի մեկնելու նպատակով:

Արմավիր-Գյումրի ճանապարհին՝ Թլիկ գյուղի մոտ, վերջիններիս միջեւ ծագել է վիճաբանություն, որի ընթացքում Վարդան Հ.-ն դանակով հարվածել է Կ. Գրիգորյանին, պատճառել մահ, ապա դիմել է փախուստի:

Ձեռնարկված օպերատիվ-հետախուզական միջոցառումների շնորհիվ՝ ժամը 19.45-ի սահմաններում նշված գյուղի դաշտից հայտնաբերել եւ բերման է ենթարկել Վարդան Հ.-ն, որը խոստովանել է կատարած հանցագործությունը:

Հանցագործության գործիք դանակն առգրավված է:

Վարդան Հ.-ն ձերբակալված է: