Կառավարության նոր կառուցվածքը հրապարակվեց. ի՞նչ սպասել դրանից (Տեսանյութ)

Եվ այսպես, կառավարության նոր կառուցվածքի նախագիծը հրապարակվեց: Այդ կառուցվածքում կլինեն 17-ի փոխարեն 12 նախարարություն: Բացի այդ, վարչապետից բացի կլինի նաև երկու փոխվարչապետների պաշտոն:

Ի՞նչ խնդիր է լուծելու իշխանությունն այս փոփոխությամբ, դեռ պարզ չէ: Սովորաբար, բարեփոխումներից առաջ, նախ հռչակվում են խնդիրները, հետո նրանց լուծման ձևերը, և միայն դրանից հետո ներկայացվում է այն կառուցվածքը, որի միջոցով իրականացվում է այս ամենը: Այսօր այդ նպատակների և նրանց լուծման ձևերի մասին ոչինչ հայտնի չէ: Ավելին, դրա մասին տեղյակ չէ նաև ներկայիս իշխանության մեծ մասը, քանզի չգիտեն, թե ինչու է մեզ, ասենք, պետք 12, այլ ոչ թե 10, կամ 16 նախարարություն:

Հասկանալի է, որ նրանք, ովքեր Նիկոլին դեմ են, քննադատելու են, որ կրճատելով նախարարությունները, մարդկանց գործազուրկ են սարքում: Նիկոլի կողմնակիցները, ճիշտ հակառակը, կնշեն, որ այդ կրճատումներով իշխանությունները կրճատեցին ուրճացված բյուրոկրատական համակարգը: Մինչդեռ իրականում և մեկ, և մյուս հիմնավորումները լուրջ չեն, քանզի չեն նշում այս փոփոխությունների իրական ֆունկցիոնալ նպատակները՝ առարկայական հարթությունում:

Դրա համար էլ հանրության առավել լուրջ հատվածի համար սրանք դեռ ոչինչ չասող փոփոխություններ են, որոնց աշխատանքի գործունեությունից պարզ կդառնա, թե ի վերջո որն էր այս ամենի իրական նպատակը:

Արտակ Հակոբյան