Էջմիածնում Մանվել Գրիգորյանը չի կարող գործոն դառնալ. քաղաքապետը՝ ցուցարարներին
Էջմիածին քաղաքի բնակիչները փակել են Երևան տանող մայրուղին: Մարդկանց պահանջը լսելու համար նրանց հետ հանդիպման է գնացել Էջմիածնի քաղաքապետ Դիանա Գասպարյանը: Էջմիածինցիները քաղաքապետին ներկայացրին իրենց պահանջները:
Նրանք պահանջում են, որ Մանվել Գրիգորյանին գրավով ազատ արձակելու որոշում կայացրած դատավորը գա ու իրենց պարազաբանում տա, թե ինչու է Գրիգորյանն ազատության մեջ: «Թող իրենց գանձին տանեն այնտեղ, որտեղից եկել է»,- ասացին նրանց: Ակցիայի մասնակիցները նշեցին, որ իրենք ակցիաներ կանեն այնքան ժամանակ, քանի դեռ դատական համակարգում չեն հասկացել, որ 25 մլն դրամով չի կարելի բաց թողնել հանրության համար վտանգ ներկայացնող մարդուն:
«Դա օրենքի տառին դեմ է: Զինվորի պեչենին գողացողին ո՞նց կարելի է ազատ արձակել»,- հարցադրում են անում նրանք: Ցուցարարները նաև պահանջում են, որ Պաշտպանության նախարարությունը Մանվել Գրիգորյանին զրկի կոչումներից:
Դիանա Գասպարյանն ասաց, որ այս բողոքի ձայնն արդեն հաստատ հասել է կառավարություն: «Երբ երեկ երեկոյան նա ազատ արձակվեց, ես արդեն ունեի հստակ տեղեկատվություն, որ Մանվել Գրիգորյանն Էջմիածին չի մտնելու: Այսինքն՝ այսպես թե այնպես շրջանցիկ ճանապարհով նա ուղեկցվել է իր ամառանոց: Էջմիածին մտնելու մասին խոսք չկա: Ես վերահաստատում եմ, որ ամեն դեպքում քաղաքացիների կողքին եմ ինչ որոշում էլ իրենք կայացնեն: Դուք ասում եք՝ ուզում եք դատավորը գա ու պարզաբանում տա: Նա չի գա այստեղ, միգուցե մենք գնա՞նք այնտեղ»,- նշեց քաղաքապետը:
Ակցիայի մասնակիցներն ասացին, որ երբ առաջիկա օրերին այլ քաղաքաներում էլ ակցիաներ լինեն ընդդեմ Մանվել Գրիգորյանի, իրենք երկուշաբթի կգնան Արդարադատության նախարարությա շենքի մոտ:
Դիանա Գասպարյանը ճշտեց՝ հավաքաված մարդիկ իշխանությունների՞ն են դեմ, սա ընդդեմ իշխանությունների՞ ցույց է: Ակցիայի մասնակիցներն ասացին, որ՝ ոչ, իրենք իշխանությունների կողքին են, բայց դեմ են նախկին ռեժիմից պահպանված դատավորներին:
«Ես ուզում եմ ձեզ հավատացնել, որ այսօր այլևս Մանվել Գրիգորյանն Էջմիածնում գործոն չէ, և նա որևէ ձևով չի տարբերվում Էջմիածնի մյուս քաղաքացիներից իր ազդեցության մակարդակով, լծակով և այլն: Այսինքն՝ այն տեսակետը, որ Մանվել Գրիգորյանը կարող է իր շուրջն ինչ-որ մարդկանց համախմբել կամ ինչ-որ ձևով իր նախկին կարգերը վերադարձնել, ես ասում եմ՝ Էջմիածնում Մանվել Գրիգորյանը չի կարող գործոն դառնալ»,- ասաց Դիանա Գասպարյանը:
Հետևեք մեզ Facebook-ում