Ինչո՞ւ է Երջանիկը բարկացած Պետրոս Ղազարյանի վրա (Տեսանյութ)

Ինչպես հայտնի է, օրեր առաջ Հ1 –ով Պետրոս Ղազարյանը հյուրընկալել էր Հայաստանում Ռուսասաստանի դեսպան Կոպիրկինին: Զրույցը շատ հետաքրքիր էր, որտեղ Պետրոսը մի շարք ակտուալ հարցեր բարձրացրեց, որոնց մի մասը հռետորական բնույթի էին:
Մասնավորապես, հարցադրումներից մեկն էլ այն էր, թե ինչո՞ւ են ռուսներն իրենց պասիվ պահում հայ հանրության հետ՝ երկխոսության հարցում: Հայաստանում արդեն տարիներ շարունակ գործում են տարբեր տիպի արևմտյան հիմնադրամներ, որոնց գլխավոր նպատակը հանրության տարբեր շերտերի հետ երկխոսության իրականացումն է: Եվ բնականաբար, այս աշխատանքի արդյունքում մեծանում է նաև Արևմուտքի դերը մեր երկրում, ինչը լավ է:

Մինչդեռ Ռուսաստանը հիմնականում աշխատում է մեկ խողովակով, բացառապես իշխանության կամ իշխանամերձ շրջանակների հետ, և դա չի նպաստում Ռուսաստանի հեղինակության մեծացմանը հանրության լայն շրջանակներում, ինչը վատ է:

Պետք է նշել, որ ռուսները հասկացել են իրենց խոցելիությունը, և զարմանալի չէր, որ Ռուսասատանի դեսպանը փաստացի համաձայնվեց Պետրոսի հարցադրման հետ, մանավանդ, որ այդ հարցադրումը անկեղծ բնույթ ուներ:

Այսպես, ռուսները պարտվեցին Արևմուտքին Ուկրաինայում և Վրաստանում: Եվ մոտավորապես նման իրավիճակ է առաջացել նաև Հայաստանում: Սակայն բարեբախտաբար մեր մոտ փոքր ինչ տարբերվում է, և ինչ ինչ, բայց Փաշինյանը ոչ Սաակաշվիլի է, ոչ էլ՝ Պորոշենկո: Սակայն որպեսզի Ռուսաստանում ավելորդ խանդ չառաջանա, ապա Պետրոսը բարեկամաբար առաջարկում է պարոն դեսպանին իշխանություններից զատ աշխատել նաև հանրության հետ, ինչպես որ դա անում են ամերիկացիներն ու եվրոպացիները:

Թվում էր, թե այս հարցադրումը պետք է որ առարկություն չառաջացներ լայն շրջանակներում, և այդպես էլ եղավ:

Սակայն պարզվում է, Պետրոսի այս հարցադրումը ոչ բոլորին է դուր եկել: Մասնավորապես, նախկին ՀՀՇ-ական գործիչ Երջանիկ Աբգարյանը իր ֆեյսբուքյան գրառումով կշտամբել է Պետրոսին և նույնիսկ վիրավորական ձևակերպումներով է հանդես եկել՝ նշելով բառացիորեն հետևյալը. «Չեմ հասկանում, էս տխմարացումը վաղո՞ւց  է սկսվել նրա գլխում, թե՞ կատարվել է Հ1 տեղափոխվելուց հետո: Աչքիդ առաջ մեկ էլ տեսնում ես մարդը դառնում է ծախու արարած»:

Այս տեքստը կարդալուց հետո կարելի է հասկանալ թե ինչ սահմանափակ ու գավառամիտ մարդու հետ գործ ունենք:

Դեռ հանրահայտ Բերտրան Ռասսելն էր ասել, որ «Մարդկության ամենամեծ չարիքը ոչ պատերազմներն են, ոչ կոմունիզմը, և ոչ էլ՝ սովը, այլ տգիտությունն է, որը ծնում է այս երեք արհավիրքները միասին»:

Երջանիկի այս մտքերը մեզ հուշում են, թե ինչ սահմանափակ մարդիկ են մեզ ժամանակին ղեկավարել: Եվ պատահական չէ, որ նման մարդկանց պատճառով է նաև մեր երկիրը այս վիճակում հայտնվել:

Բայց այստեղ մեկ այլ կողմ էլ կա, եթե Երջանիկը Պետրոսին ծախու է անվանում, և փաստորեն մեղադրում «ռուսամետության» մեջ, ապա ինչո՞ւ էր Երջանիկը բարձր պաշտոն զբաղեցնում այն իշխանության մեջ, որը ռազմավարական դաշնակցային հարաբերություններ էր հաստատել Ռուսաստանի հետ: Իսկական ծախու լինելը դա է, ցինիզմ և փարիսեություն՝ միաժամանակ: Իսկ թե ինչպես կարող էր նման մարդը աշխատել նման բարձր պաշտոնում, դա էլ խնդրի այլ կողմն է:

Սակայն, ցավոք, այս ցինիկները քաղաքական պատասխանատվության չենթարկվեցին, դրա համար էլ որոշ ժամանակ անց նրանց «լեզուները երկարեց», և այսօր իրենց արած-չարածները «մարսած»՝ արդեն հանդգնում են «դասեր տալ» ուրիշներին:

Ոչինչ, ժամանակը ամեն ինչ իր տեղը կդնի, պարզապես համբերել է պետք:

Դավիթ Մկրտչյան