Անգամ Աննա Հակոբյանն է ժամանակին քննադատել Արշակ Կարապետյանին

Փորձագիտական շրջանակներում և համացանցում ակտիվորեն քննարկվում է Նիկոլ Փաշինյանի վերջին նշանակումը: 
 Ինչպես հայտնել ենք, Զինված ուժերի գլխավոր շտաբի հետախուզության վարչության նախկին  պետ, գեներալ-մայոր Արշակ Կարապետյանը նախօրեին  նշանակվել է Նիկոլ Փաշինյանի խորհրդական: 

Հիշեցնենք, որ Արշակ Կարապետյանն այն պաշտոնյաներից էր, ով Ապրիլյան քառօրյայից հետո ազատվեց զբաղեցրած պաշտոնից: 
Այս ժամանակ կուլիսներում խոսում էին, որ Արշակ Կարապետյանի անվան հետ էին կապվում ապրիլյան պատերազմի ժամանակ հետախուզության կողմից թույլ տրված խոշորագույն բացթողումները, որոնք էլ մեծաքանակ զոհերի պատճառ դարձան: 

Արշակ Կարապետյանի պաշտոնազրկության պատճառների մասին մամուլն ակտիվորեն գրել է նաև 2016 թ-ին: Դրանից անմասն չէր մնացել նաև ներկայիս վարչապետի պաշտոնակատար Նիկոլ Փաշինյանի կինը՝ Աննա Հակոբյանը, ով 2016 թ-ին Հայկական Ժամանակ օրաթերթի գլխավոր խմբագիրն էր:

Ստորև ներկայացնում ենք Աննա Հակոբյանի քննադատական վերլուծությունը Արշակ Կարապետյանի պաշտոնազրկության պատճառների մասին:

2016 թ. ապրիլի 28, Եկել է կոստյումներով դավաճանների հատուցման պահը. նոր իրականություն Հայաստանում

«Ինչու են պատերազմական գործողությունների ժամանակ զոհված 50-ին հասնող զինվորները բացառապես աղքատ ընտանիքների երեխաներ», «Ինչու բանակը անհրաժեշտ մակարդակի տեխնիկական հագեցվածություն չունի», «Ինչու պետական պաշտոնյաներն ունեն միլիոնների հասնող կարողություն, տների փոխարեն պալատներ, մեքենայի փոխարեն ամենավերջին արտադրության տասնյակ մեքենաներ, իսկ զինված ուժերում նորմալ մեքենա չկա դիրքեր հաց ու ջուր կամ փամփուշտ հասցնելու համար», «Ինչու պետք է Հայաստանի եւ աշխարհասփյուռ հայ ժողովուրդը փող հավաքի ԼՂՀ ՊԲ-ի համար կամ ինչու պետք է նորագույն զենքեր գնելու փող Հայաստանը չունենա, այն դեպքում, երբ ամենաբարձր պաշտոններ զբաղեցնող կամ զբաղեցրած մեկ ձեռքի մատների վրա հաշվվող պաշտոնյաների եւ նրանց ընտանիքի անդամներին «թափ տալու դեպքում» այնքան փող կընկնի, որ նույնիսկ Ամերիկայի բանակը զինելուն կբավականացնի», այս հարցադրումները շատ են, եւ համառորեն շրջանառվում են, մարելու կամ մոռացվելու որեւէ միտում ցույց չտալով:

Ու սա այն դեպքն է, երբ իշխանությունը մանեւրելու, դրանք չնկատելու տալու որեւէ շանս չունի: Նրանք ստիպված են պատասխանել այս հարցադրումներին, եւ այդ պատասխանները ենթադրում են կոնկրետ գործողություններ: Նախօրեին, օրինակ, շատ կոնկրետ պատասխան եղավ հարցերին, թե ինչու ապրիլի լույս 2-ի գիշերվանից առաջ հայկական բանակը պատշաճ չափով տեղեկացված չի եղել ծրագրվող հարձակման մասին, եւ դրա պատճառով ունեցել է կորուստներ, որոնցից կարող էր խուսափել: Աշխատանքից ազատվեց զինված ուժերի գլխավոր շտաբի հետախուզության վարչության պետ, գեներալ-մայոր Արշակ Կարապետյանը:

Շարունակությունը կարդացեք սկզբնաղբյուր կայքում 

Zham.am