Ովքեր կհայտնվեն ապագա ԱԺ-ում. մեր դիտարկումները (Տեսանյութ)

Եվ այսպես, այս նախընտրական արշավը մոտենում է ավարտին, ու թեև ընտրությունների ֆավորիտը հայտնի է, գլխավոր ինտրիգը կայանում է նրանում, թե ինչ ցուցանիշ կարձանագրի Փաշինյանի թիմը, և ովքեր կլինեն մյուս երկու կամ երեք ուժերը, որոնք նույնպես կհայտնվեն ապագա ԱԺ-ում:

Նախ ներկայացնենք, թե որ ուժը ինչ գլխավոր ասելիքով հանդես եկավ հանրության առջև:

Սկսենք «Իմ քայլը» դաշինքից:

«Իմ քայլը» դաշինք

Այս ուժը լինելու է ընտրությունների գլխավոր ֆավորիտը և այդ հարցում ոչ ոք չի կասկածում: Նրանց գլխավոր խոսքը այն է, որ իրենք են ապրիլյան հեղափոխությունն իրականացրած գլխավոր ուժը, և ուրեմն հանրությունը վստահության մանդատը հիմնականում իրենց պիտի տա՝ նոր Հայաստան կառուցելու համար:

Ընտրարշավում հիմնական ակտիվ դեմքը եղել է Փաշինյանը: Ընտրարշավը կրեատիվ բնույթ չի ունեցել, սակայն այն կոմպենսացվել է անձամբ Փաշինյանի ակտիվությամբ:

Այս անգամ Փաշինյանի ռազմավարությունը կառուցված էր ոչ թե սև-սպիտակի կոնցեպտի վրա, այլ՝ ՀՀԿ-ին հակադրվելու վրա, որը տակտիկական տեսանկյունից հասկանալի քայլ էր: Դրանով Փաշինյանի թիմը մաքսիմալ կարողացավ կոնսոլիդացնել ոչ միայն իր կողմնակիցներին, այլև՝ ՀՀԿ-ից վախեցածներին: Այս մոդելը 1996-ին կիրառեցին Ելցինի կողմնակիցները՝ ընդդեմ կոմունիստների, և արդյունքը չուշացավ, այն պայմանական կոչվում էր՝ «голосуй или проиграешь»:

Նախընական հարցումները ցույց են տալիս, որ այս ուժը հավաքելու է քվեների մոտ 70 տոկոսը: Այս թիվը համընկնում է նաև մեր դիտարկումների հետ:

ՀՀԿ

Այս ուժի նախընտրական արշավը ամենակրեատիվն էր: Նրանց ռազմավարությունը՝ հակադրվելն էր բացառապես Փաշինյանի թիմի հետ, ցույց տալու համար, որ Փաշինյանի խոսքն ու գործը իրարից շատ են տարբերվում: ՀՀԿ-ի ընտրազանգվածը հանրության առավել պահպանողական ու զգուշավոր շերտն է, որը վախենում է ցնցումներից և հենց դրա համար էլ ՀՀԿ-ական քարոզչությունը նույնպես հիմնված էր «голосуй или проиграешь» կոնցեպտի վրա՝ մաքսիմալ կոնսոլիդացնելու համար ոչ միայն իրենց կողմնակիցներին, այլև նրանց, ովքեր վախեցած են Փաշինյանից և տեսնում են նրա միակ ընդդիմախոսը՝ ՀՀԿ-ին:

Այն կանխատեսումները, թե այս ուժը չի լինի ապագա ԱԺ-ում, մեր կարծիքով իրականությանը չի համապատասխանում:
Մեր կարծիքով նրանք կլինեն ապագա պարլամենտում 2-րդը, կամ՝ 3-րդը:

ԲՀԿ

ԲՀԿ-ն, ի տարբերություն «Իմ քայլը» դաշինքի և ՀՀԿ-ի, չունի հստակ քաղաքական դիմագիծ:

Սակայն քաղաքական իներցիայի հաշվին այս ուժը նույնպես կլինի ապագա ԱԺ-ում: Բացի այդ, Փաշինյան - ՀՀԿ հակադրության արդյունքում ԲՀԿ-ն ինչ - որ չափով շահեկան է դուրս գալիս, քանի որ իր դեմ ընդգծված հակաքարոզչություն չի իրականացվում:

Բացի այդ, գյուղերում Փաշինյանի էյֆորիան զգալիորեն թուլացել է, և հնարավորություն է բացվել Ծառուկյանի ռեյտինգային ոչ թույլ թեկնածուների համար:

«Լուսավոր Հայաստան»

Այս ուժը թեև հայտարարում է, որ ուզում է դառնալ Փաշինյանի ապագա «դեմոկրատական» ընդդիմությունը, իրականում լայն ընտրազանգված չունի: Նրանց աջակցում են հանրության այն շերտերը, որոնք մերժում են ՀՀԿ-ին, սակայն Փաշինյանի կադրային քաղաքականությանը նույնպես չեն հավատում:

Պետք է նշել, որ միջին խավի մոտ այս ուժը պոպուլյար է, ինչպես որ 2000- ականներին պոպուլյար էր «Օրինաց Երկիրը»:

Այս ուժը մեծ հավանականությամբ շատ ձայներ կհավաքի Երևանում և Լոռիում: Ինչ վերաբերվում է ապագա ԱԺ-ում լինել-չլինելու հարցին, ապա դա կախված է նրանից, թե ինչ ցուցանիշ կարձանագրի Փաշինյանի թիմը:

ՀՅԴ

Այս ուժը միշտ ունեցել է ավանդական ընտրազանգված, սակայն ապրիլյան հեղափոխությունն ու էյֆորիան կարող են լրջորեն խանգարել ՀՅԴ-ին՝ հաղթահարելու 5 տոկոսանոց շեմը:

«Մենք» դաշինք

Այս դաշինքը նոր է ձևավորված և դժվար թե կարողանա հաղթահարել 5 տոկոսանոց արգելքը, մանավանդ որ «Իմ քայլը» դաշինքի և Լուսավորների հետ մրցակցության դաշտում ակնհայտորեն զիջում է:

«Սասնա Ծռեր»

Գաղափարական տեսանկյունից այս ուժը ուներ բոլոր շանսերը՝ հայտնվելու ապագա պարլամենտում: Սակայն քարոզարշավն իրականացրին չափազանց վատ և ապաշնորհ ձևով: Զգացնել տվեց փորձի պակասությունը: Բացի այդ, Փաշինյանի վարկանիշը թույլ չտվեց, որ հանրության առավել արմատական շերտը հիսթափվի և նոր փրկիչ գտնի՝ ի դեմս այս ուժի:

Մյուս ուժերին իմաստ չունի անդրադառնալ, քանզի նրանք քաղաքական «սպոյլերների» դեր են կատարում, և հանրությունը նրանց առանձնապես չի ճանաչում, որ նրանք կարողանան անհրաժեշտ ձայներ հավաքել:

Այսպիսով, ամփոփելով, կարող ենք արձանագրել, որ մեր կարծիքով, գալիք պարլամենտում ներկայացված կլինեն «Իմ քայլը» դաշինքը, ՀՀԿ-ն և ԲՀԿ-ն: Հարցականի տակ է «Լուսավոր Հայաստանի» խնդիրը:

Ինչքանով այս կանխատեսումը մոտ կլինի իրականությանը, կիմանաք դեկտեմբերի 9-ին:

Արտակ Հակոբյան