Ով փորձի ցեխ շպրտել ԲՀԿ–ի վրա, «Կենտրոնով» նրա անցածը կետ առ կետ կներկայացնենք. Ծառուկյան

«Ես ձեզ չեմ ասելու, որ մենք վերեւից երկնքից աստղեր ենք իջեցնելու կամ ունենք կախարդական փայտիկ»։ Այս մասին այսօր՝ նոյեմբերի 28-ին, Իջեւանում ընտրողների հետ հանդիպման ժամանակ ասաց «Բարգավաճ Հայաստան» կուսակցության առաջնորդ Գագիկ Ծառուկյանը։

«Ամենակարեւորը, որ ես ուզում եմ ձեզ ասել, այսօր այստեղ եմ՝ ներկայացնելու մեր ծրագիրը։ Ծառուկյանը գիտի խնդիրները եւ դրանց լուծումը։ Ես ապրել եմ այս երկրում, ապրելու եմ եւ իմ հնարավորության սահմաններում ինչ-որ կա՝ արել եմ, անելու եմ՝ անկախ ձայներից ինչքան կտաք, չեք տա»,– ասաց նա։

Ամենակարեւոր խնդիրը ժողովրդի համար, ըստ Ծառուկյանի, բանկային համակարգն է. «Այսօր ազգովի բանկի տակ են, տոկոսի տակ են, վարկերի տակ են: Մենք ունենք 650 հազար ընտանիք, եւ ունենք միլիոն ու կես վարկառու, այսինքն՝ ամեն ընտանիքին 2 ու կես մարդ, համարյա 3 մարդ վարկի տակ է, այսինքն՝ կինը, ամուսինը, տղան, աղջիկը, մեկը վերցնելով, մյուսը՝ փակելով: Խնդիրը պետք է կարգավորվի: Եվ պետության աջակցությունն է պետք եւ բանկերի սեփականատերերի: Այդ վիճակով բանկերի գրավներն էլ են արժեզրկվում»:

ԲՀԿ առաջնորդի խոսքով՝ այսօր վարկը 8-14 տոկոս է, բայց մարդկանց տարեկան շահույթը 7 տոկոս է, եթե վարկ վերցնես, ո՞նց ես տակից դուրս գալու. «Ո՞նց կարող է նման բան լինել, տուժելու դեպքում, ուրեմն գրավն էլ է կորելու: Պետք է լինի այնպես, որ դու բանկից տոկոս ես վերցնում, պետք է այն տարվա շահույթից պակաս լինի: Բանկի տոկոսը պետք է լինի 3-4 տոկոս, որ ժողովուրդը կարողանա շնչել»:

Ծառուկյանն անդրադարձել է նաև ուսանողների խնդիրներին, փոքր և միջին բիզնեսին վերաբերվող հարցերի, առողջապահական հարցերի:

Նա շեշտել է, որ փոքր ու միջին բիզնեսին պետք է հնարավորություն տանլ, թեթեւացնել հարկերը:

Ծառուկյանի խոսքով՝ լուրջ է նաեւ առողջապահության խնդիրը, իսկ պետպատվերը չարիք է։ Նրա համոզմամբ՝ ամեն մարզում պետք է անվճար հիվանդանոց լինի, որտեղ բնակիչները կկարողանան բուժօգնություն ստանալ։

«Անհնարին ոչինչ չկա, մենք պետք է ոչ թե խնդրենք մարդկանց գալ եւ ներդրում անել, այլ իրենք պետք է գան խնդրեն, ներդրում անեն։ Դրա համար հարկերը պիտի պակաս լինեն, հնարավորություններ ստեղծվեն։ Հիմա ոնց որ Դուբայում՝ առաջ հարկեր չի եղել, աշխարհի ամենալավը կառուցել են, հիմա արդեն հարկեր են դրել»,– նշել է Գագիկ Ծառուկյանը:

«Ես իմ թիմին ասել եմ՝ հարգելի գործընկերներ, եթե իմանամ մեկի վրա ցեխ եք շպրտել, իմացեք՝ կուսակցությունից կհեռացնեմ։ Դուք ձեր գործը ներկայացրեք»,– նշել է նա՝ հավելելով, որ նաեւ եթե մեկը փորձի ցեխ շպրտել ԲՀԿ–ի վրա, ապա «Կենտրոն» հեռուստաընկերությամբ հանրությանը «նրա անցածը կետ առ կետ կասեն՝ ով ա, ինչ ա, ումն ա, ինչի շնորհիվ ա, ինչի համար ա անում եւ իրա նպատակն ինչ ա»: