«Զիբիլիքսի» գործով բոլոր մեղադրյալներն ընդունել են իրենց մեղքը. Սասուն Խաչատրյան

Այսպես կոչված «Զիբիլիքսի» գործով բոլոր մեղադրյալներն ընդունել են իրենց մեղքը: Այսօր՝ նոյեմբերի 28-ին, ՀՀ Հատուկ քննչական ծառայության օրվան նվիրված միջոցառման ժամանակ այս մասին հայտարարեց ծառայության ղեկավար Սասուն Խաչատրյանը:

«Իրականացված քննչական և դատավարական գործողությունների, ինչպես նաև դրանց զուգահեռ ԱԱԾ-ի և գործընկերների հետ իրականացված օպերատիվ-հետախուզական միջոցառումների արդյունքում ձեռք բերված ապացույցներով հիմնավորվել է, որ ՀՀԿ-ի Արաբկիրի տարածքային կառույցի ղեկավարը և «ՍԱՍ» սուպերմարկետների ցանցի տնօրենն իրենց կողմից ձևավորված ենթաշտաբերի միջոցով 2017 թվականի մայիսի առաջին տասնօրյակում շուրջ 130 հազար դոլարին համարժեք դրամը, որպես ընտրակաշառք, 10.000-ական դրամ բաժանել են տարածքի ընտրողներին՝ ՀՀԿ-ի կողմից առաջադրված քաղաքապետի թեկնածուի օգտին քվեարկելու համար»,- նշեց Խաչատրյանը:

ՀՔԾ պետի խոսքով՝ «Զիբիլիքսի» գործով արձանագրված արդյունքն աննախադեպ էր Հայաստանի նորագույն պատմության մեջ, քանի որ առաջին անգամ նախաքննության ընթացքում հիմնավորվել է ընտրակեղծարարության ամբողջ շղթան:

«ՀՔԾ-ում քննվող հիշյալ քրեական գործով վերսկսված նախաքննության ընթացքում, այսինքն՝ այս տարվա հունիս-սեպտեմբերին, հարցաքննվել են 200-ից ավելի անձինք, դատարան են ներկայացվել 14 միջնորդություններ՝ խուզարկության, օպերատիվ-հետախուզական միջոցառումներ իրականացնելու, բջջային հեռախոսահամարների զանգերը վերծանելու, բանկային գաղտնիք հանդիսացող տեղեկություններ ստանալու մասին և այլն: Տարբեր հասցեներում իրականացվել են խուզարկություններ, կատարվել են 61 զննություններ, առերեսումներ»,- մանրամասնեց ՀՔԾ պետը:

Վերը նշված հանցավոր արարքների կատարման համար նշված երկու անձանց, ինչպես նաև կաշառք տալու հարցում նրանց օժանդակած 9 անձանց մեղադրանքներ են առաջադրվել, 11 մեղադրյալների վերաբերյալ քրեական գործը մեղադրական եզրակացությամբ ուղարկվել է դատարան. «Ի դեպ՝ նշեմ, որ բոլոր մեղադրյալներն իրենց մեղքն ամբողջութամբ ընդունել են: Գործից անջատված մասով նախաքննությունը շարունակվում է»: