Ընտրիր, եթե սոված ես. ՀՀԿ-ի կարգախոսը ֆեյսբուքահայության ուշադրության կենտրոնում (լուսանկարներ)

Օրեր առաջ Հայաստանի Հանրապետական Կուսակցությունը, որը նույնպես մասնակցելու է դեկտեմբերի 9-ին կայանալիք արտահերթ խորհրդարանական ընտրություններին, հրապարակել է իր նախընտրական կարգախոսը՝ «Եթե մտահոգ ես, ընտրիր Հանրապետականին»:

Այս կարգախոսը ֆեյսբուքահայությունը ակտիվ շրջանառության մեջ է դրել¸ սակայն սեփական ընթերցմամբ՝ մեմերի տեսքով: 

Գտնվել են նաև օգտատերեր¸ որոնք ՀՀԿ-ի կարգախոսի քաղաքական գնահատականն են տվել¸ նշելով¸ որ այդ կարգախոսն ի վնաս ՀՀԿ-ի աշխատում:

««Եթե մտահոգ ես՝ ընտրիր Հանրապետականին» լոզունգը մտածած մարդը իր կուսակցության թշնամին է, լուրջ։ Որովհետև ցինիզմ է մտահոգ լինել մի կուսակցության հետ, որից զոռով, իսկապես՝ մի կերպ ազատվել է Հայաստանի քաղաքացիների ճնշող մեծամասնությունը։ Ձեր իրական «թշնամիները» ձեր ներսում են, ու շարունակում են իրականությունից հեռու պահել ու նորից ամպոտել ՀՀԿ-ի ոտքերը։

Մարդիկ մտահոգ էին, դրա համար էին Հրապարակում։ Մտահոգ էին, դրա համար են ինքնակամ ընտրել իրենց գցել էս խառը վիճակի մեջ, անցնել սխալների միջով, թերությունների միջով, նեղության միջով՝ մենակ թե հինը էլ հանկարծ չգա։ Մարդիկ իրենց սեփական կամքով գցել են տուրբուլենտ գոտի, տեղ-տեղ իրոք պատից պատ են խփվում, բայց հավատալով, որ հետո հաստատ լավ կլինի, որովհետև սա անխուսափելի փուլ է ու էս ամենի միջով պարտադիր է անցնել՝ ֆինանսական տատանումներով, լավ ու վատ նշանակումներով, մասնագետների ու ինքնահռչակների միջով, բոլոր լավ ու վատ տարբերակներին համաձայն են, դուք եկել ասում եք՝ եթե մտահոգ եք․․․ Այո, մտահոգ են։ Ու հենց դրա համար ձեզ չեն ընտրում։ Պատրաստ են ընտրել ցանկացածին՝ ձեզնից բացի ու դիմանալ ամեն ինչի՝ մենակ թե հետ չգաք»¸ - ֆեյսբուքյան իր էջում գրել է Սյունե Սևադան։

Սյունե Սևադայի արտահայտած «քաղաքական գնահատականը» արժանացել է 700 օգտատիրոջ հավանության:   

Zham.am