«Ինձ անգամ սպառնում էին սպանել». Ասյա Խաչատրյանի հետ լուսանկարված ադրբեջանցին պատմել է հայրենակիցներից ստացած սպառնալիքների մասին

Երիտասարդ ադրբեջանցի Թեհրան Բայրամովը, որի համատեղ լուսանկարները հայուհի Ասյա Խաչատրյանի հետ մեծ իրարանցում են առաջացրել ադրբեջանցի ու հայաստանցի օգտատերերի շրջանում, haqqin.az կայքին պատմել է հայրենակիցներից ստացած բազմաթիվ սպառնալիքների մասին: Փոխանցում է Tert.am-ը:

Բայրամովը խոստովանել է, որ այդ աստիճան խիստ բացասական արձագանք ու մեծ աղմուկ չէր սպասում: Երիտասարդը նշել է, որ ստացել է բազմաթիվ սպառնալիքներ:

«Երբ կիսվում էի այդ լուսանկարներով՝ հույս ունեի միավորել մարդկանց: Սակայն արձագանքը չափից դուրս բացասական եղավ: Ես բախվեցի իմ դեմ վիրավորանքների հզոր ալիքի: Ինձ անպատվում էին, անգամ սպառնում սպանել: Սակայն ես դրան մեծ նշանակություն չեմ տալիս», - նշել է տղան:

Ծնունդով Բաքվից Բայրամովը պատմել է, որ հայ աղջկա հետ ծանոթացել է համացանցով, նրանք սկզբում շփվել են երկու երկրների միջև պատերազմի թեմայով ու պարզել, որ երկուսն էլ դեմ են բռնությանը: Ժամանակի հետ ընկերացել են ու ամիսներ անց որոշել հանդիպել Թբիլիսիում:

Վրաստանի մայրաքաղաքում Թեհրանն ու Ասյան անցակցրել են երկու օր, ինչից հետո աղջիկը վերադարձել է Հայաստան:

Երիտասարդը կտրականապես հերքել է ադրբեջանական մամուլում հայտնված այն լուրերը, ըստ որոնց` նա ու Ասյան մտերիմ հարաբերությունների մեջ են ու անգամ պատրաստվում են ամուսնանալ:

«Դա սուտ է, մենք ուղղակի երկու երիտասարդ ենք, որոնք չեն ցանկանում պատերազմ: Մենք լավ ընկերներ ենք, ոչ ավելին», - ասել է Բայրամովը:

Tert.am