«Համաներման նախագիծը կլրամշակվի». Արտակ Զեյնալյան

Այսօր ՀՀ արդարադատության նախարարի պաշտոնակատար Արտակ Զեյնալյանը  լրագրողների հետ զրույցում հայտնեց, որ համաներման նախագիծը կլրամշակվի:

Այն «աննախադեպ» համարելու առթիվ հնչած քննադատությունների վերաբերյալ՝ Զեյնալյանն ասաց.

«Աննախադեպ լինելու վերաբերյալ գնահատականը դուք լրիվ իրավունք ունեք տալու: Մենք ասել ենք «ընդարձակ», դա հենց այդպես էլ կա: Մենք ունենք հիմնավոր փաստաթղթեր, ըստ որոնց` այս համաներումը բավական ընդգրկուն է»:

Անդրադառնալով ցմահ դատապարտվածների հարազատների բողոքի ակցիաներին և պահանջներին, Զեյնալյանը պատասխանեց, որ դա բովանդակային քննարկման ոլորտ է, որտեղ պետք չէ մտնել: Նա խոստացավ այդ հարցի պատասխանը տալ առաջիկայում:

«Մեր վերաբերմունքն այս ոլորտում պիտի նկատած լինեք, որ փոխվել է, եթե ցանկություն ունեք տեսնելու, որ այս ոլորտում քաղաքականությունը փոփոխություն կրել է: Այսպիսի քանակով վաղաժամկետ ազատումներ չեն եղել, չի եղել դեպք, երբ դրական եզրակացություններ տրվեն ցմահ ազատազրկվածներին պայմանական վաղաժամկետ ազատման համար: Այս ոլորտում իրականացվում են տեխնիկական լուծումներ, որոնք թույլ կտան նաև բովանդակային արդյունքի հասնել»,- նշեց նա:

Զեյնալյանը կրկնեց,  որ այս համաներումն իր բարությամբ տարբերվում է նախորդներից, անհատական մոտեցում է ցուցաբերվում յուրաքանչյուրին և հիշեցրեց, որ համաներում դեռ չկա, իսկ նախագիծը քննարկման փուլում է: 

Zham.am