Ռուբեն Ջաղինյանն ու Մարգարիտա Գրիգորյանը իրենց հավատարմությու՞նն են հայտնել նոր իշխանությանը

Սույն թվականի հուլիսի 4-ին, ՀՀ գլխավոր դատախազությունը տարածեց հաղորդագրություն, ըստ որի` քրեական գործ էր հարուցվել «Հանրային հեռուստաընկերություն» ՓԲԸ-ում հայտնաբերված ֆինանսական չարաշահումների մասով։

«Ընտրանքային ուսումնասիրությամբ պարզվել է, որ ֆիլմերի կամ հաղորդաշարերի ձեռքբերման նպատակով կնքված ընդհանուր 118 մլն 223 դրամի թվով 4 պայմանագրերով կազմվել և օգտագործվել են իրականությանը չհամապատասխանող կամ կեղծ նախահաշվային փաստաթղթեր: Մասնավորապես՝ հաստատվել են աշխատանքներ կատարող կամ ծառայություն մատուցող ընկերությունների բազմաթիվ աշխատակիցների կամ մասնագետների առկայություն և դրանց համար ծախսերի հաշվարկներ: Մինչդեռ ՀՀ ԿԱ ՊԵԿ-ից ստացված տվյալների համադրությամբ պարզվել է, որ նշված տնտեսվարող սուբյեկտները կամ ընդհանրապես գրանցված աշխատակիցներ չեն ունեցել, կամ` դրանց թվաքանակը եղել է զգալիորեն պակաս», — ասված էր հաղորդագրությունում:

Ըստ դատախազության, բացի այդ, հեռուստահաղորդումների ձեռքբերման նպատակով կնքված պայմանագրերում, տեխնիկայի տրամադրում չնախատեսելու պայմաններում, ընկերությունը 2 դեպքում երրորդ անձանց հետ կնքել է տեխնիկայի վարձակալության ընդհանուր 30 մլն 500 հազար դրամի պայմանագրեր՝ կատարելով չհիմնավորված, հավելյալ ծախսեր:

Գլխավոր դատախազությունը նշում է, որ հեռուստաարտադրության և տեխնիկական միջոցների վարձակալության պայմանագրերը կնքվել են չնայած նրան, որ ընկերությունն ունեցել է ռեժիսորական, հեռուստաօպերատորական, արտատաղավարային նկարահանումների և լուսային ապահովման բաժիններ՝ համալրված 50-ից ավելի մասնագետներով և հարյուրավոր միավորներ տարբեր անվանումների հեռուստաարտադրության տեխնիկական անհրաժեշտ միջոցներով:

Ըստ դատախազության ուսումնասիրության, արդեն իսկ պարզվել է, որ «Հայաստանի հանրային հեռուստաընկերություն» ՓԲԸ կողմից պետության բյուջետային միջոցներով 2015-2016 թվականներին իրականացված շուրջ 168.5 մլն դրամի ծախսերը կատարվել են իրականությանը չհամապատասխանող կամ կեղծ նախահաշվային փաստաթղթեր, կատարողական ակտեր կազմելով և օգտագործելով, ուռճացված, անհիմն ծախսեր հաշվարկելով և վճարելով:

Դատախազության հայտարարությունից ուղիղ մեկ ամիս առաջ ՀՀ ֆինանսների նախարարը Ազգային ժողովում հայտարարում էր, որ ֆինանսական չարաշահումներ տեղի չեն ունեցել․«Խոսքը ընթացակարգային շեղումների և միայն մոտ 180 մլն դրամի մասին է խոսքը, որը վերականգնման ենթակա գումար է եղել, ու դա վերականգնվել է։ Իսկ մնացածը սահմանված ընթացակարգերին անհամապատասխան արձանագրումեներ են եղել, և դրանք այժմ շտկվել են»,- ասել էր Ատոմ Ջանջուղազյանը։

Եվ, չնայած, Գլխավոր դատախազության կողմից քրեական գործի հարուցման փաստին, կառացվարությունը չշտապեց ազատվել Հայաստանի Հանրային հեռուստառադիոընկերության խորհրդի նախագահ Ռուբեն Ջաղինյանից և Հանրային հեռուստաընկերության գործադիր տնօրեն Մարգարիտա Գրիգորյանից, ովքեր տարիներ շարունակ պետական միջոցներով ֆինանսավորող հեռուստաընկերությունը ծառայեցնում էին  ժամանակի իշխանություններին։

Թերևս, ճշմարիտ են շրջանառվող այն լուրերը, որոնց համաձայն Ջաղինյանն ու Գրիգորյանը իրենց հավատարմություն են հայտնել նոր իշխանությանը և կշարունակեն աշխատել՝ արդեն հավատարիմ դարձած գործելավոճով: