Վահրամ Բաղդասարյանի բարեկամուհի դասվարը բռնությու՞ն է գործադրել աշակերտի հանդեպ. ոստիկանությունում նյութեր են նախապատրաստվում

Երեկ համացանցում լուրեր տարածվեցին, որ Վանաձորի թիվ 24 հիմնական դպրոցում առաջին դասարանի աշակերտի հանդեպ բռնություն է գործադրվել: Ստորև՝ ահազանգի ամբողջական տեքստը.

«Ահազանգ Կրթության նախարարությանը
Վանաձորի թիվ 24 հիմնական դպրոցում/ տնօրեն Հասմիկ Հովսեփյան/, 1-ին Ա դասարանի դասվար Անահիտ Գաբրիելյանը ֆիզիկական և հոգեբանական բռնություն է գործադրել աշակերտի նկատմամբ, դասարանի աշակերտների առջև բռնի ուժով գրատախտակի մոտ քարշ տալով աշակերտին՝ նվաստացրել ու ծաղրել է, բազմիցս հայհոյել՝ ոչխար, անասուն և այլն բառերով: Թույլ չի տվել երեխային զանգել մորը կամ ինքը չի արել դա, այլ թողել է մինչև վերջ երեխան լաց լինի ու նվաստանա: Առաջին դասարանի աշակերտը, դեպքից հետո, բնականաբար, հրաժարվում է գնալ դպրոց: Տնօրենը և տվյալ դասվարը հետապնդում են են սկսել մոր նկատմամբ, այն բանից հետո երբ վերջինս բողոքել է: Իսկ երբ հրապարակել է դպրոցի սննդի, ծնողական դրամահավաքի և այլ դեպքերի մասին փաստեր, հետապնդմանը միացել են նաև դասարանի ծնողները, մարզպետարանի կրթության բաժինը՝ փորձելով իրավիճակը շրջել ծնողի դեմ՝ իրենց բարի համբավը պախարակելու համար:
Աշակերտը բացառիկ ընդունակություններ ունի, տարբերվում է մյուս աշակերտներից և հրաժարվում է, օրինակ, անգիր անել դասվարի ոտանավորները, որոնք ի դեպ Անահիտ Գաբրիելյանը պարտադրում է դասարանի աշակերտներին անգիր սովորել և դասերին արտասանել:
Սպասում եմ գործնական միջամտության, կասկած կա՞, որ պատասխանատվության պետք է ենթարկվեն դասվարը, տնօերնը և մարզպետարանի աշխատակիցները:
P. S. Ծնողը, իհարկե, նախարարություն նամակ արդեն գրել է, բայց նամակները շատ են և դանդաղ են տեղ հասնում»:

Politik.am-ը կապ հաստատեց դպրոցի տնօրեն Հասմիկ Հովսեփյանի հետ, ով հերքեց վերը նշվածի ճշմարտացիությունը.

«Ինչ-որ միջադեպ եղել է հոկտեմբերի 2-ին: Այժմ այդ հարցով Ոստիկանությունն է զբաղվում: Ես բացառում եմ, որ նման բան է եղել: Երեխան էլ այժմ դասի է: Բայց ոչ թե իր, այլ զուգահեռ դասարանում՝ ծնողի դիմումի համաձայն»:

Զրուցեցինք նաև երեխայի ծնողի՝ Աննա Նազարյանի հետ.

«Երեխայի հանդեպ բռնություն է եղել: Դա փաստ է: Ամբողջ դասարանի ներկայությամբ նվաստացրել է երեխային, վիրավորել: Ամեն ինչ սկսվել է իմ՝ դրամահավաքին դեմ խոսելուց: Դրանից հետո սկսվել են երեխայիս հանդեպ հետապնդումները»:

Աննա Նազարյանը տարօրինակ է համարում հատկապես Ոստիկանության միջամտությունը: Ինքը չի դիմել Ոստիկանություն, ուրիշ մեկն է դիմել.

«Ամենակարևորն այն է, որ նյութեր են նախապատրաստվում ոչ թե դասվարի, այլ ընտանեկան բռնության վերաբերյալ: Ծնողները որոշել են ամեն ինչ շրջել իմ դեմ, ու ներկայացրել են, թե փողոցում տեսել են` ինչպես եմ երեխայիս ծեծում: Դա, իհարկե, չի եղել: Այսtեղ այլ հարց կա՝ ծնողները մինչ այդ դեպքերը ևս դժգոհում էին դասվարից, հետո հանկարծ սկսեցին պաշտպանել: Բայց ես նույնիսկ «Վայբերում» եղած իրենց նամակներն ու գրառումներն ունեմ, որտեղ լրիվ այլ բան են ասել: Գուցե սա իրենց կողմից ինքնապաշտպանական ռեակցիա է, կամ ճնշել են, չգիտեմ»:

Ծնողն ասում է նաև, որ դպրոցի տնօրենը որևէ գործողություն չի իրականացրել, միայն ասել է, որ չի կարող պատժել դասվարին: Ավելին՝ երբ երեխային դպրոց է տարել, ասել են, որ տեղափոխի դպրոցից:

Աննա Նազարյանը շեշտում է նաև, որ դասվարը պատգամավոր Վահրամ Բաղդասարյանի բարեկամուհին է: