ՀՀ ԱԳՆ-ն դիմել է Կասպրշիկի գրասենյակին Ադրբեջանի կողմից զինադադարի համաձայնագրերի կոպտագույն խախտումների վերաբերյալ

Արդեն մի քանի օր է՝ ադրբեջանական զինուժը Տավուշի եւ Վայոց Ձորի սահմանամերձ գյուղերի ուղղությամբ գնդակոծություն է իրականացնում: Դրանց հետեւանքով Տավուշի մարզի Կոթի համայնքի բնակիչ է վիրավորվել:

«Այդ անպատժելիության մթնոլորտին պետք է վերջ դրվի», - այս մասին ArmTimes-ի հետ զրույցում հայտարարեց ՀՀ ԱԳՆ մամուլի խոսնակ Տիգրան Բալայանը:

- Պարոն Բալայան, վերջին օրերին Ադրբեջանի իրականացրած գործողությունների հետ կապված ԱԳՆ-ն միջազգային կառույցների դիմե՞լ է:

- Այո, առաջին հերթին համանախագահներին` Կասպրշիկի գրասենյակին: Այլ ուղղություններով եւս հիմա ինտենսիվ աշխատանք է ընթանում` տեղեկացնելով միջազգային հանրությանը Ադրբեջանի` զինադադարի համաձայնագրերի կոպտագույն խախտումների վերաբերյալ: Սա ուղիղ հետեւանքն է Ադրբեջանի կողմից 2 տարի առաջ ապրիլյան պատերազմից հետո ձեռք բերված պայմանավորվածությունների կատարման խոչընդոտմանը:

Այդ անպատժելիության մթնոլորտին պետք է վերջ դրվի, այստեղ ավելի լուրջ անելիք ունի միջազգային հանրությունը, առաջին հերթին ԵԱՀԿ Մինսկի խմբի համանախագահ երկրները:

- Դեռ հայտարարությամբ հանդես չե՞ն եկել այդ կառույցները:

- Ոչ, հանդես չեն եկել: Հայտարարությունները եղել են շարունակական, որ այդ պայմանավորվածությունները հարկավոր է ի կատար ածել, բայց Ադրբեջանը շատ անպատասխանատու եւ ապակառուցողական կեցվածքով շարունակում է խոչընդոտել դրանց իրականացմանը: Նրանք փոխանակ իրենց պարտականությունները իրականացնեն, որպես միջազգային հանրության անդամ, հակառակն են անում` ամեն ինչ անում են, որ դրանք չիրականան:

- Իսկ զսպող գործողությունն այս դեպքում պետք է միայն միջազգային կառույցների հայտարարություննե՞րը լինեն:

- Զսպող գործողությունների մասին երեկ խոսել է վարչապետը: Կարծում եմ՝ բոլորի համար էլ հստակ է, թե ինչ գործողություններ են մեր զինված ուժերը իրականացնում:

ArmTimes