Պետական բոլոր կառույցները երեք օր «քննություն կհանձնեն». Արծրուն Հովհաննիսյան

Վաղը մեկնարկում է «Շանթ 2018» հրամանատարաշտաբային զորավարժությունը, որով կփորձարկենք մեր պետական բոլոր կառույցների ունակություները պայմանականորեն պատերազմի վիճակի ժամանակ: Այդ մասին այսօր, լրագրողների հետ հանդիպմանն ասաց ՀՀ պաշտպանության նախարարության մամուլի քարտուղար Արծրուն Հովհաննիսյանը:

«Զորավարժությամբ նախատեսված ու չնախատեսված անակնկալ քայլերով կստուգենք մեր մարտունակությունը պետական ապարատի բոլոր ասպեկտներով: Կիմանանք, թե ինչպես ենք արձագանքում ռիսկերին, իրավիճակի սրացմանը և այլն: Նշեմ, որ սցենարով ոչ միայն ագրեսիա է նկատվելու հակառակորդի կողմից սահմանում, այլ կարող են լինել բնածին ու այլ աղետներ»,- ասաց նա՝ ավելացնելով, որ այն տևելու է երեք օր:

Ըստ բանախոսի՝ զորավարժությունն այնքան իրատեսական սցենարներով է իրականացվելու, որ անգամ լրագրողները չեն իմանալու, թե երբ, որտեղ, ինչ գործողություն է տեղի ունենալու: Մասնակիցների թվի մասին հստակ թվեր չնշեց:

Լրագրողների հարցին՝ իսկ ինչո՞ւ Արցախը չի մասնակցում «Շանթ 2018-ի» Հովհաննիսյանը պատասխանեց, որ Արցախի Հանրապետությունը իրավաբանորեն այլ պետություն է:

Իր խոսքում բանախոսը ընդգծեց, որ այս անգամ մեծ ուշադրություն են հատկացվել զորավարժության տեղեկատավական միասնական կենտրոնի ստեղծմանը:

«Լրագրողների համար նույնպես սա փորձություն է լինելու, նրանց համար աշխատանքային հատուկ գոտի կլինի, բայց հերթական գործողության կամ մտացածին միջադեպի մասին վերջիններս նույնպես րոպեներ առաջ կիմանան: Հատուկ լոգո ենք ընտրել, սոցիալական ցանցերում արդեն իսկ բացված էջեր կան, իսկ հրապարակումների մեջ պետք է նշվի, որ այն պատրաստվել է «Շանթ 2018-ի» շրջանակներում»,- մանրամասնեց ՊՆ մամուլի քարտուղարը:

Լրագրողներին Հովհաննիսյանը տեղեկացրեց նաև, որ զորավարժության առաջնահերթ խնդիրներից է նաև ստուգել պետական ապարատի պատրաստվածությունը նոր Սահամանդրության ամբողջական կիրարկումից հետո:

Vesti.am