Օսիպյանը «Մարտի 1»-ի նոր գործով հարցաքննության չի հրավիրվել

Հայաստանի ոստիկանապետ Վալերի Օսիպյանը «Մարտի 1»-ի նոր գործով հարցաքննության չի հրավիրվել։ Այդ մասին նա հայտնեց կառավարության նիստից հետո լրագրողների հետ ճեպազրույցում։

«Ազատության» հարցին ի պատասխան ոստիկանապետն ասաց, որ 2008 թվականի մարտի 1-ին եղել է Ազատության հրապարակում։ «Այո՛, եղել եմ մի քանի հարյուրավոր ոստիկանների պես», - նշեց Օսիպյանը։

«Ազատություն». - Նստարանների տակ տեսե՞լ եք ցուցարարների թաքցրած զենք։

Օսիպյան. - Զենք-զինամթերք չեմ տեսել, բայց փայտեր բոլորս էլ տեսել ենք։

«Ազատություն». - Այդ օրը առավոտյան ցուցարարներից դիմադրություն տեսե՞լ եք։

Օսիպյան. - Այսպես պատասխանեմ՝ հիմա կառավարության դեմը բազմաթիվ քաղաքացիներ կան, ակցիա են իրականացնում, պայմանական ընդունենք, որ հարակից Տիգրան Մեծը փակել են, ոստիկանները մոտենան, պահանջեն փողոցը բացել, բնականաբար, հրաժարվեն՝ ավտոմատ քաշքշուկ է ստեղծվելու, դիտվելու է որպես քաշքշուկ, թեպետ ոստիկանությունն օրինական գործողություն է իրականացնում, և չի բացառվում, որ օրենքով նախատեսված կարգով կարող է ֆիզիկական ուժ կիրառվել, դա պետք է որպես դիմադրությո՞ւն դիտվի։

«Ազատություն». - Դուք կարո՞ղ եք ասել, որ այդ օրը հրապարակ էիք մտել, որովհետև օպերատիվ տվյալներ կային, որ թաքցված նյութեր կան։

Օսիպյան. - Ես չեմ կարող դա ասել, քանի որ չեմ տիրապետել այդ պահին, թե ինչ է տեղի ունենում։

Իսկ թե ո՞վ է հրաման տվել մարտի 1-ի առավոտյան ժողովրդին բռնի ուժով հեռացնել հրապարակից, Օսիպյանը խորհուրդ տվեց հարցնել այդ օրերի ոստիկանության վերադասին։ «Վերադասին հարցրեք՝ այն անձանց, ովքեր այդ օրը վերադաս են համարվել, ես ընդամենը հասարակական կարգ եմ ապահովել», - ասաց նա։

Մանրամասները՝ «Ազատություն»-ում